ТОШКЕНТ, 21 июнь. /“Дунё” АА/. 16–18 июнь кунлари мамлакатимизда бўлиб ўтган V Тошкент халқаро инвестиция форумида иштирок этган Туркиянинг “GNY Aerospace Havacilik Hizmetleri Limited Şirketi” компанияси асосчиси ва бошқарувчи директори Атилла Гюней “Дунё” АА мухбирига интервью берди.

– Сўнгги олти-етти йил давомида Ўзбекистонда фуқаро авиацияси соҳасининг ривожланишини диққат билан кузатиб бордим. Мамлакат раҳбариятининг мазкур соҳани ривожлантириш бўйича сўнгги ёндашувлари билан таниш эканман, бу йўналишда бизнес ва инвестициялар учун катта имкониятлар яратилганини таъкидламоқчиман.

Айнан шунинг учун компаниямиз Тошкентда амалга оширилиши мумкин бўлган, тор фюзеляжли самолётлар учун асосий компонентлардан бири билан боғлиқ махсус лойиҳани ишлаб чиқди. Бу ерга биринчи марта келишим. Форум жараёнини кузатар эканман, юртингизда тадбиркорлик фаолиятини юритиш учун етарли шарт-шароитлар мавжудлигига амин бўлдим.

Айниқса, форум доирасида ташкил этилган саноат кўргазмаси менда катта таассурот қолдирди. Ишончим комилки, ушбу ташрифдан сўнг Ўзбекистонда янги бизнес имкониятларини яратиш бўйича фаолиятимизни янада жадал давом эттирамиз.

Умуман олганда, V Тошкент халқаро инвестиция форуми жаҳон миқёсида, юксак савияда ташкил этилди. Бундай йирик тадбирлар ишбилармонларга минтақада ўз бизнеси ва инвестиция фаолиятини ривожлантириш учун кенг имкониятлар яратади.