БЕРЛИН, 3 апрель. /“Дунё” АА/. Берлиннинг Темпельхоф-Шёнеберг округида Марказий Осиё давлатларининг Германиядаги элчихоналари ва “Cultur-Cooperation e.V.” маданий ташкилоти ҳамкорлигида маданият ва санъат кунлари ўтказилди, деб хабар бермоқда “Дунё” АА.

Наврўз арафасида ташкил этилган тадбирда Германиянинг расмий ва ишбилармон доиралари, Берлинда аккредитациядан ўтган дипломатик корпус, жамоатчилик ва ватандошлар ҳамда журналистлар иштирок этди.

Ўзбекистон, Қирғизистон, Қозоғистон ва Тожикистон элчилари билан бир қаторда Германия Ташқи ишлар вазирлиги ва Темпельхоф-Шёнеберг тумани вакиллари ҳам сўзга чиқиб, умумий қадриятлар ва анъаналар халқларни бир-бирига яқинлаштиришини таъкидлади.

Миллий услубда безатилган Ўзбекистон стенди, байрамона либослар, атлас ва адрас матолар, ҳунармандчилик буюмлари, маданий дастурлар ва туристик маълумотлар меҳмонларда катта таассурот қолдирди. “Халқлар дўстлиги” саройи ансамблининг куй-қўшиқ ва рақслари барчага хушкайфият бахш этди. Баҳорий таомлар ­– сомса ва палов иштирокчиларга маъқул бўлди.

Тадбирда қўшни давлатлардан ташриф буюрган санъаткорлар жамоалари ҳам концерт дастурлари тақдим этишди. Минтақавий миллий удумларга бағишланган викторина ўтказилди ва ғолибларга эсдалик совғалар топширилди.