СЕУЛ, 25 август. /“Дунё” АА/. Жанубий Кореянинг энг йирик "Shinhan Financial Group" молиявий холдинги раиси Чин Ок Дон мамлакатимиз мустақиллигининг 35 йиллиги арафасида “Дунё” АА орқали юртдошларимизга ўзининг самимий табриги ва эзгу тилакларини йўллади.

– Ўзбекистон халқини мамлакат мустақиллигининг 35 йиллиги билан самимий табриклаш мен учун катта шараф.

Мустақиллик йилларида Ўзбекистон улкан тараққиёт йўлини босиб ўтди. Бугун мамлакат иқтисодий салоҳиятини ишонч билан намоён этаётган, кенг кўламли ислоҳотларни изчил амалга ошираётган ва жаҳон иқтисодиётига тобора фаол интеграциялашаётган давлат сифатида ўз ўрнини мустаҳкамлаб бормоқда.

Сўнгги йилларда Ўзбекистонда амалга оширилаётган кенг кўламли ўзгаришлар алоҳида эътиборга сазовор. Иқтисодиётнинг очиқлигини таъминлаш, хусусий тадбиркорликни қўллаб-қувватлаш, инвестиция муҳитини яхшилаш, рақамлаштириш ва молия секторини модернизация қилиш мамлакатнинг барқарор иқтисодий ўсиши учун янги имкониятлар яратмоқда.

Замонавий ва барқарор молия тизими иқтисодиёт тараққиётининг муҳим асосларидан биридир. Самарали молия тизими тадбиркорликни ривожлантириш, инвестиция лойиҳаларини амалга ошириш, инновацияларни жорий этиш ҳамда аҳоли ва бизнес учун янги имкониятлар яратишга хизмат қилади.

Шу боис, компаниямизнинг халқаро тажрибасига таянган ҳолда, Ўзбекистон бозорининг ўзига хос хусусиятлари ва эҳтиёжларини инобатга олиб, мамлакатдаги фаолиятимиз ва ҳамкорлигимизни янада кенгайтиришга интилаяпмиз.

Бугун Жанубий Корея ва Ўзбекистон ўртасидаги муносабатлар молиявий ҳамкорлик билан чекланиб қолмаяпти. Мамлакатларимизни фаол мулоқот, ўзаро ишонч ва қўшма лойиҳаларга асосланган мустаҳкам дўстлик ва стратегик шериклик муносабатлари боғлаб турибди.

Мамлакатларимиз ўртасида ҳамкорликни янада ривожлантириш учун ҳали кўплаб имкониятлар мавжуд. Ўзбекистоннинг улкан иқтисодий салоҳияти, ёш ва фаол авлоди, инновацияларга интилиши ҳамда янги ғояларга очиқлиги Кореянинг технологик ва молиявий имкониятлари билан уйғунлашиб, янги қўшма лойиҳалар ва муваффақиятлар учун мустаҳкам замин яратади.

“Shinhan Financial Group” бундан кейин ҳам Ўзбекистоннинг ишончли ҳамкори бўлиб қолиш, мамлакат молия секторини ривожлантиришга кўмаклашиш, тадбиркорликни қўллаб-қувватлаш ва Жанубий Корея ҳамда Ўзбекистон ўртасидаги иқтисодий алоқаларни янада мустаҳкамлашга ўз ҳиссасини қўшиш ниятида.

Қутлуғ айём арафасида Ўзбекистон халқига чин дилдан тинчлик, фаровонлик, бирдамлик ва тараққиёт тилайман.

Жанубий Корея ва Ўзбекистон ўртасидаги дўстлик, ўзаро ишонч ва стратегик шериклик муносабатлари янада мустаҳкамлансин.