БУДАПЕШТ, 29 июль. /“Дунё” АА/. Венгриянинг “Daily News Hungary” нашрида Ўзбекистон Президентининг Қирғизистонга давлат ташрифи арафасида икки мамлакат ўртасидаги стратегик шерикликнинг янги босқичига бағишланган мақола эълон қилинди, деб хабар бермоқда “Дунё” АА мухбири.

Мақолада ушбу давлат ташрифи Ўзбекистон ва Қирғизистон ўртасидаги сиёсий мулоқотни янада фаоллаштириш, савдо-иқтисодий алоқаларни кенгайтириш, транспорт, энергетика ва саноат соҳаларидаги ҳамкорликни ривожлантириш йўлидаги муҳим қадам экани ҳақида сўз юритилган.

Муаллиф сўнгги йилларда икки давлат муносабатлари изчил ривожланиб бораётгани, чегара масалалари тўлиқ ҳал этилгани ва бу Марказий Осиёда ўзаро ишонч ҳамда яхши қўшничилик муҳитини мустаҳкамлашга хизмат қилаётганини эътироф этган. Шу билан бирга, савдо ҳажмини ошириш, саноат кооперациясини кенгайтириш ва транспорт боғлиқлигини кучайтириш икки томонлама ҳамкорликнинг устувор йўналишлари сифатида кўрсатилган.

Мақолада Қамбарота ГЭС-1 қурилиши ва “Ўзбекистон–Қирғизистон–Хитой” темир йўли лойиҳаси каби йирик ташаббуслар стратегик шерикликка янги мазмун бағишлаши ҳамда бутун Марказий Осиёнинг транспорт ва энергетика тизимларини ривожлантиришда муҳим аҳамият касб этиши таъкидланган.

Нашрнинг ёзишича, Ўзбекистон Президентининг Қирғизистонга давлат ташрифи қўшма лойиҳаларни амалга оширишга янги суръат бағишлайди ҳамда икки қардош давлат ўртасидаги кўп қиррали ҳамкорликни янада мустаҳкамлашга хизмат қилади.