МОСКВА-КРАСНОГОРСК, 1 сентябрь. /“Дунё” АА/. Ўзбекистон делегацияси Москва ва Красногорск шаҳарларида меҳнат қилаётган 650 нафарга яқин ҳамюртларимиз билан учрашди, деб хабар бермоқда “Дунё” АА мухбири.

“Five Towers”, “РЕНКОНС” ва “СберСити” объектларида ишлаётган ватандошлар билан бўлиб ўтган учрашувда консуллик-ҳуқуқий ҳимояни таъминлаш масалалари муҳокама қилинди. Делегация вакиллари юртдошларимиз мурожаатларини кўриб чиқиб, муаммоли масалалар юзасидан зарур тушунтиришлар берди ва амалий ёрдам кўрсатди.

Делегация вакиллари ватандошларнинг меҳнат ва яшаш шароитлари билан танишди. Қўшимча ўрганишни талаб қиладиган масалалар иш берувчилар ва ваколатли идоралар билан биргаликда кейинчалик ишлаб чиқиш учун назоратга олинди.

Фуқароларимиз билан Россия қонунчилиги, мамлакатда бўлиш қоидалари ва жамоат тартибига риоя этиш юзасидан профилактик суҳбатлар ўтказилди. Хавфсизлик талаблари ҳамда учувчисиз учиш аппаратлари ҳужуми таҳдиди юзага келганда ҳаракатланиш тартиби алоҳида тушунтирилди.