СЕУЛ, 30 июль. /“Дунё” АА/. Жанубий Кореянинг нуфузли “Diplomacy Journal” нашрида Ўзбекистон ва Қирғизистоннинг стратегик шериклик алоқаларига бағишланган таҳлилий мақола эълон қилинди, деб хабар бермоқда “Дунё” АА мухбири.

Мақолада ёзилишича, сўнгги йилларда икки қўшни мамлакат ўртасидаги сиёсий мулоқот ва ўзаро ишонч мисли кўрилмаган даражада мустаҳкамланди. Барча баҳсли чегара масалаларининг тарихий ва ўзаро манфаатли тарзда ҳал этилиши чегараолди ҳудудларида савдо-сотиқ, эркин ҳаракатланиш ва иқтисодий алоқаларни жадаллаштириш учун муҳим пойдевор бўлиб хизмат қилмоқда.

Нашрда савдо-иқтисодий, инвестициявий ва транспорт-логистика соҳаларидаги ҳамкорлик динамикасига алоҳида эътибор қаратилган. Жумладан, саноат кооперациясини кенгайтириш, Хитой–Қирғизистон–Ўзбекистон темир йўли қурилиши каби минтақавий аҳамиятга эга йирик инфратузилма лойиҳалари ҳамда “Қамбарота ГЭС-1” энергетика иншоотини биргаликда барпо этиш ташаббуслари Марказий Осиёнинг янги иқтисодий харитасини шакллантираётгани қайд этилган.

Шу билан бирга, ўзаро маданий-гуманитар алоқалар ва халқлар ўртасидаги кўп асрлик дўстлик ришталари жадал ривожланаётгани эътироф этилган.

Давлат раҳбарларининг сиёсий иродаси ва узоқни кўзлаган ташқи сиёсати туфайли Тошкент ва Бишкек ўртасидаги муносабатлар нафақат икки давлат, балки бутун Марказий Осиё минтақасида барқарорлик, хавфсизлик ва изчил тараққиётни таъминловчи муҳим омилга айланмоқда.