ТОШКЕНТ, 18 июнь. /“Дунё” АА/. Бугун футбол бўйича Ўзбекистон миллий терма жамоаси 2026 йилги FIFA Жаҳон чемпионатидаги илк учрашувини Колумбия терма жамоасига қарши ўтказди, деб хабар бермоқда “Дунё” АА мухбири.

Терма жамоамизнинг дунё биринчилигидаги тарихий дебюти муносабати билан Ўзбекистоннинг хориждаги дипломатик ваколатхоналари ва консуллик муассасалари томонидан ватандошлар, дипломатик корпус вакиллари ҳамда чет эллик мухлислар иштирокида ўйинни жамоавий томоша қилиш тадбирлари уюштирилди.

Хусусан, Душанбе шаҳрида Ўзбекистон элчихонаси томонидан ташкил этилган тадбирда ватандошлар, ОАВ ва дипломатик корпус вакилларидан иборат 120 га яқин киши қатнашди. Душанбедаги “Crown Plaza” меҳмонхонаси биноси фасадида Ўзбекистон Давлат байроғининг нурли проекцияси намойиш этилгани тадбирга ўзига хос рамзий маъно бахш этди.

Ашхобод шаҳридаги тадбир Ўзбекистон элчихонаси ташаббуси билан Туркманистон томонининг кўмагида ташкил этилди. “Тошкент” ресторанида бўлиб ўтган ўйин кузатувида дипломатик корпус вакиллари, ўзбек диаспораси ва Туркманистон жамоатчилиги жам бўлди.

Владивосток шаҳрида Ўзбекистон Бош консулхонаси ватандошлар, талабалар ва дипломатик корпус вакиллари учун жамоавий томоша ташкил этди. Тадбир доирасида мамлакатимизнинг туризм салоҳияти ва V Тошкент халқаро инвестиция форумига оид материаллар ҳам тақдим этилди.

Санкт-Петербург, шунингдек, Петрозаводск ва Калининград шаҳарларида Ўзбекистон Бош консулхонаси ташаббуси билан Россиянинг Шимоли-Ғарбий федерал округида таҳсил олаётган талабалар ва ватандошлар иштирокида жамоавий кузатувлар бўлиб ўтди. Ўзбекистон Давлат мадҳиясини куйлаш билан бошланган ушбу тадбирлар бирдамлик ва миллий терма жамоани қўллаб-қувватлаш муҳитида кечди ҳамда Россиянинг федерал “Матч ТВ” спорт телеканали мухбирлари томонидан кенг ёритилди.

Сеул шаҳрида Ўзбекистон элчихонаси томонидан уюштирилган жамоавий томошада 200 дан зиёд ўзбек диаспораси вакиллари иштирок этди. Мамлакатимиз элчиси кириш сўзи билан чиқиб, хориждаги юртдошларимиз жипслигининг аҳамиятини алоҳида таъкидлади. Тадбирда Марказий Осиё давлатлари дипломатик миссиялари вакилларининг ҳам қатнашгани минтақавий бирдамлик руҳини янада кучайтирди. Мазкур воқелик Жанубий Кореянинг нуфузли “AJU Press” ОАВ томонидан ёритилди.

Токио шаҳрида Ўзбекистон элчихонаси ташаббуси билан ватандошлар иштирокида ҳамда Турк маданият маркази кўмагида ташкил этилган трансляцияда Озарбайжон ва Марказий Осиё давлатлари элчилари, ОАВ, илмий доиралар вакиллари ҳамда талабалар қатнашдилар. Иштирокчилар Ўзбекистоннинг Жаҳон чемпионатидаги иштироки тарихий аҳамиятга эга эканлигини қайд этиб, миллий терма жамоамизга кейинги ўйинларда юксак зафарлар тиладилар.

Қувайт давлатида Ўзбекистон элчихонаси ташаббуси билан “Limak İnşaat” компанияси ҳудудида ушбу мамлакатда меҳнат қилаётган ватандошларимизнинг учрашуви ташкил этилди. Юртдошларимиз ўйинни биргаликда кузатиб, миллий терма жамоамизни фаол қўллаб-қувватладилар ва уларнинг дунё биринчилигидаги иштироки катта воқелик эканини эътироф этдилар.

Исломобод шаҳридаги мамлакатимиз элчихонасида эса МДҲ давлатларининг Покистондаги дипломатик ваколатхоналари раҳбарлари Ўзбекистон миллий терма жамоасининг Колумбияга қарши кечган баҳсини биргаликда кузатдилар. Дипломатлар ўзбек футболчиларининг юксак иштиёқи ва Жаҳон чемпионатидаги тарихий иштирокини юқори баҳолаб, жамоага келгуси ўйинларда омад ёр бўлишини тиладилар.