БЕРЛИН, 14 январь. / “Дунё” АА/. Ўзбекистон миллий терма жамоаси сардори Элдор Шомуродов ФИФАга берган эксклюзив интервьюсида жамоанинг 2026 йилги жаҳон чемпионатига тайёргарлиги ва келажакдаги режалари ҳақида гапирди, деб хабар бермоқда “Дунё” АА мухбири.

Футболчи сўнгги йилларда халқаро майдонда ўзбек футболига қизиқиш юқори эканини таъкидлаб, Ўзбекистонда спортга, хусусан, футболга бўлган муносабат ҳақида сўз юритган.

“Болалигимда терма жамоамиз ЖЧга чиқа олмаганида мухлислар хавотирга тушганини эслайман. Бугун вазият бутунлай бошқача. Президентимизнинг спортга эътибори, яратилган шароитлар туфайли мухлисларнинг жамоамизга ишончи ортди. Футболчиларимиз Европанинг энг кучли клубларида ўйнай бошлашди”, дея фикр юритган ҳужумчи.

Элдор Шомуродовнинг сўзларига кўра, ЖЧ—2026 Ўзбекистон учун алоҳида аҳамиятга эга. Сурхондарё вилояти тарбияланувчиси нафақат миллий терма жамоанинг етакчи тўпурарига, балки бутун минтақа футболи муваффақиятининг рамзига айланди. Унинг Россия, Италия ва Туркиядаги муваффақиятли фаолияти ўзбек футболчиларининг жаҳон майдонларидаги рақобатбардошлигини кўрсатади.

Ўзбекистон ЖЧ—2026да Португалия, Колумбия каби гранд жамоалар билан бирга “K” гуруҳидан жой олди. Терма жамоа сардори жамоа рақиблардан қўрқмаслигини ва турнирдаги иштирокини ўзбек футболининг қудратини бутун дунёга намойиш этиш имконияти сифатида кўришини таъкидлаган.

“Вазифамиз — гуруҳдан чиқиш. Биз мамлакат шарафини ҳимоя қилиб, Ўзбекистон кучли жамоа эканини исботламоқчимиз. Кимдир бизни аутсайдер деб ўйлаши мумкин, аммо бизнинг мақсадимиз ҳаммани ҳайратда қолдириш”, деди футболчи.

Сардорнинг таъкидлашича, бутун минтақадан келган мухлисларнинг қўллаб-қувватлаши жамоага қўшимча масъулият ва ўзига хос кайфият юклайди.

“Жаҳон чемпионатидаги иштирокимиз нафақат ўзбекистонлик мухлисларни, балки Марказий Осиё футбол мухлисларини ҳам хурсанд қилмоқда. Агар муносиб ўйин кўрсатсак, ўзбек футболи бутун дунё бўйлаб янги мухлисларни жалб қилади”, дея қўшимча қилди у.

ФИФАнинг қайд этишича, Ўзбекистон терма жамоаси дунёнинг етакчи клубларидан бири — “Реал” сафида тўп сурган Криштиану Роналду ва Хамес Родригес каби машҳур футболчилар жамоаларига қарши муносиб кураша олади.

Айни пайтда Элдор Шомуродов Истанбулнинг “Башакшеҳир” клуби шарафини ҳимоя қилмоқда. У Туркия чемпионатида 17 та ўйинда 12 та гол уриб, тўпурарлар пойгасида пешқадамлик қилаяпти. Абдуқодир Ҳусанов, Аббос Файзуллаев каби ёш иқтидорлар билан бирга Шимолий Америка майдонларида ўзбек футболининг янги саҳифасини очишга тайёр.