ТОШКЕНТ, 10 июнь. /“Дунё” АА/. 2026 йилги футбол бўйича Жаҳон чемпионати вақтида ФИФА мухлислар учун 79 доллар эвазига ўз исмини стадион экранларида кўрсатиш имконини берувчи “Super Shoutout” номли янги хизматни йўлга қўяди, деб хабар бермоқда “Дунё” АА мухбири “Казинформ” халқаро ахборот агентлигига таяниб.

“Алоҳида эътироф” маъносини англатувчи ушбу хизмат АҚШ, Мексика ва Канададаги 16 та стадионда бўлиб ўтадиган гуруҳ босқичи ўйинларининг барча (72 та)сида амал қилади. Мухлисларнинг исмлари жамоаларнинг ўйиндан олдинги чигалёзди машғулотлари вақтида табло орқали намойиш этилади.

Хабарлар 30 та белгидан ошмаслиги ва смайликларни ўз ичига олмаслиги керак. ФИФАнинг баёнотига кўра, ушбу ташаббус мухлисларнинг турнирга бўлган қизиқишини оширишга қаратилган.

Бироқ, бу янгилик ижтимоий тармоқларда салбий муносабат уйғотди. Фойдаланувчилар ушбу хизматни танқид қилиб, бу ФИФАнинг медиа ҳуқуқлар, ҳомийлик шартномалари ва чипталар савдосидан оладиган улкан даромадларига қарамай, қўшимча пул ишлаш учун қилган навбатдаги уриниши эканини таъкидлади.

“ABC News” телеканали сурати