ТОШКЕНТ, 18 июнь. /“Дунё” АА/. Германия Федерал президенти Франк-Вальтер Штайнмайер Ўзбекистонга икки кунлик расмий ташрифини якунлар экан, оммавий ахборот воситалари вакилларига олий даражадаги Ўзбекистон–Германия саммити якунлари юзасидан интервью берди.

– Ўзбекистонга ташрифимиз давомида бизни анъанавий ўзбекона меҳмондўстлик билан кутиб олишди. Бугун эса биз ўзига хос бир воқеанинг гувоҳи ҳам бўлдик. Ўзбекистон миллий футбол терма жамоаси мустақилликнинг 35 йили мобайнида илк бор жаҳон чемпионатига йўлланмани қўлга киритгани билан бутун мамлакат ҳақли равишда фахрланмоқда.

Миллионлаб инсонлар мухлислик қилган биринчи ўйин кутилганидек кечмади, бироқ олдинда гуруҳ босқичининг яна иккита учрашуви бор. Биз жамоага чин дилдан муваффақият тилаймиз ва унинг мусобақада янада олға боришига умид қиламиз.

Айни дамда биз Ислом цивилизацияси маркази ёнида турибмиз. Унинг номига эътибор беринг – гап дин ҳақида эмас, айнан цивилизация ҳақида бормоқда. Бу Марказий Осиёнинг исломгача ва ислом даври тарихи ҳақида таъсирчан тарзда ҳикоя қилувчи йирик илмий-маърифий марказдир.

Албатта, биз бу ерга фақат мамлакатнинг бой маданияти ва тарихи билан танишиш учун келмадик. Ташрифнинг биринчи кунида асосий эътибор Ўзбекистон Президенти билан бўлган музокараларга қаратилди. Биз сиёсий ҳамкорликни янада мустаҳкамлаш, иқтисодий алоқаларни кенгайтириш истиқболларини, икки мамлакат одамлари ўртасидаги алоқаларни чуқурлаштириш йўлларини муҳокама қилдик.

Германия технологиялари Ўзбекистонда яхши танилган ва юқори қадрланади. Кўплаб немис компаниялари мамлакат иқтисодиёти ривожига аллақачон салмоқли ҳисса қўшиб келмоқда. Айни пайтда, ҳамкорлик салоҳияти ҳали тўла ишга солинмаган. Айнан шунинг учун ҳам мен бу ерга нуфузли ишбилармонлар делегацияси ҳамроҳлигида келишни муҳим деб ҳисобладим.

Ташрифимиз арафасида Ўзбекистон идоралари, корхоналари ва немис компаниялари ўртасида қатор музокаралар бўлиб ўтди ва уларнинг натижасида янги келишувлар имзоланди. “Volkswagen” компанияси Ўзбекистонда ишлаб чиқариш корхонасини қуриш ва ишга тушириш тўғрисида қарор қабул қилганини мамнуният билан қайд этаман.

“Rhenus” компанияси йирик логистика маркази лойиҳасини амалга ошираётган бўлса, “Henkel” мамлакатдаги сармоявий иштирокини кенгайтирмоқда. Булар Германия бизнесининг Ўзбекистонга қизиқиши ортиб бораётганини яққол кўрсатувчи бир нечта мисол, холос.

Бу кўп жиҳатдан минтақанинг ўзига хос географик жойлашуви билан ҳам боғлиқ. Марказий Осиё йигирма йилдан ортиқ вақтдан бери эътиборимни тортиб келади. Германия нуқтаи назаридан, бу минтақа Европа ва Осиё ўртасидаги энг муҳим кўприкдир. Ўзбекистон ўзининг боғловчи бўғин сифатидаги ролини доимо англаб келган ва ана шу стратегик устунликка таяниб, изчил сиёсат юритган.

Одамлар ўртасидаги алоқаларга келсак, яқин йилларда улар фақат кенгайиб боришига ишончим комил. Бунга Ўзбекистондан бўлган малакали мутахассисларга Германияда осонроқ ишга жойлашиш имконини берадиган янги Миграция ва мобиллик тўғрисидаги битим хизмат қилади.

Бундай имкониятларга қизиқиш анча юқори. Ўзбекистон аҳолиси ҳар йили тахминан бир миллион кишига кўпаймоқда. Кўплаб ёшлар учун касбий камолотга эришиш нафақат ички меҳнат бозори, балки хорижда ишлаш истиқболлари билан ҳам боғлиқ.

Шу билан бирга, бугунги кунда Германия ягона йўналиш эмас. Бутун дунёда малакали кадрлар учун рақобат кетмоқда ва биз бу ҳақиқатни инобатга олишимиз зарур. Бироқ, бизнинг мавқейимиз анча мустаҳкам кўринади. Ҳозирги вақтда 400 мингдан ортиқ Ўзбекистон фуқароси немис тилини ўрганмоқда ва Германияга қизиқувчилар сони ортишда давом этяпти.

Аввал ҳам таъкидлаганимдек, Марказий Осиё йигирма йилдан зиёд профессионал фаолиятимда алоҳида ўрин тутади. 2006 йили Германия ташқи ишлар вазири лавозимида ишлаётганимда ушбу минтақа билан янада фаолроқ ҳамкорлик қилиш ташаббусини илк бор илгари сурган эдим. Ўша пайтларда биз ва Марказий Осиё мамлакатлари ўртасидаги алоқалар анча чекланган, минтақа давлатларининг ўзаро муносабатлари эса мураккаблигича қолаётган эди.

Кейинчалик, Европа Иттифоқининг Марказий Осиёга нисбатан фаолроқ сиёсатини шакллантиришда иштирок этишга муваффақ бўлдим. Бундан жуда мамнунман. Шу боис бу ерга мунтазам келиб, юз бераётган ўзгаришларни диққат билан кузатиб бордим.

Бугун йигирма йиллик тажрибага таяниб, рўй берган ўзгаришлар кўламига холис баҳо бера оламан. Бу ўзгаришлар, айниқса, Ўзбекистонда яққол намоён бўлмоқда. Ўтган йиллар давомида мамлакат сиёсий ва иқтисодий муносабатларни ишонч билан ривожлантириш мумкин бўлган ишончли ва доимий ҳамкорга айланди.

Сўнгги йилларда Ўзбекистон ва Марказий Осиё Европа учун нима сабабдан алоҳида аҳамият касб этди, деган саволга жавобан қуйидагиларни қайд этмоқчиман. Ўтган йигирма йил ичида улкан йўл босиб ўтилди. Дастлаб яқинлашиш жараёни осон кечмаган бўлса-да, бугунги кунда натижалар кўзга яққол ташланиб турибди. Ушбу ташриф ва Ўзбекистон раҳбарияти билан ўтган самарали музокаралар ўзаро ишонч ва ҳамкорлик юксак даражада эканини кўрсатмоқда.

Фикримча, бугунги кунда иқтисодиёт, савдо-сотиқ, сармоя, таълим, илм-фан ва маданий алмашинув соҳаларида ҳамкорликни янада кенгайтириш учун мустаҳкам замин яратилган. Айнан шу сабабли, ушбу сафар якунлари бўйича Германия, Европа Иттифоқи ва Ўзбекистон ўртасидаги муносабатларнинг келгусида янада мустаҳкамланишига катта ишонч билан қарайман.

Шу боис, ушбу ташрифни айнан шу ерда, Ўзбекистонда якунлаётганимдан чин дилдан мамнунман. Биз сиёсий мулоқотни ривожлантириш баробарида халқларимиз ўртасидаги инсоний ришталарни мустаҳкамлашга ҳам ўз ҳиссамизни қўшмоқдамиз.