ТОШКЕНТ, 17 январь. /“Дунё” АА/. “The Athletic” оммабоп порталида шу йил АҚШ, Канада ва Мексикада ўтказиладиган футбол бўйича жаҳон чемпионати чипталарини харид қилиш учун рекорд даражада ариза топширилгани ҳақида мақола эълон қилинди, деб хабар бермоқда “Дунё” АА мухбири.

Нашр маълумотларига кўра, сешанба куни якунланган бир ойлик ариза топшириш даврида чипта сотиб олиш учун 500 миллиондан ортиқ сўров келиб тушган. Аризаларни қабул қилиш декабрь ойида бўлиб ўтган жаҳон чемпионати қуръаси ва ўйинлар тақвими эълон қилинганидан кўп ўтмай бошланган. Мухлислар маълум тоифа ва белгиланган нархларда муайян ўйинларга чипталар учун ариза топшириш имкониятига эга бўлган.

Февраль ойида ФИФА турнирнинг 104 та ўйинининг ҳар бирига тасодифий қуръа ташлайди ва унинг натижаларига кўра, чипталар танланган аризачилар ўртасида тақсимланади. Аввалроқ, октябрь-ноябрь ойларида ташкилот якуний жадвал тасдиқлангунга қадар 2 миллионга яқин чипта сотган эди. Умуман олганда, турнир давомида тахминан 4-5 миллион чипта қолади.

Мақолада ёзилганидек, ҳар бири биттадан тўрттагача чиптани ўз ичига олиши мумкин бўлган 500 миллиондан ортиқ аризалар 2026 йилги жаҳон чемпионати мухлислар томонидан мисли кўрилмаган қизиқишга эга эканидан далолат беради. Шу билан бирга, ташкилотнинг таъкидлашича, талаб даражаси аниқ ўйинларга қараб, сезиларли даражада фарқ қилиши мумкин.

2026 йилги жаҳон чемпионати Ўзбекистон учун ҳам тарихий бўлади. Чунки футбол бўйича мамлакат миллий терма жамоаси тарихда илк бор жаҳон чемпионатига йўлланма олди.

Бундан ташқари, етакчи хорижий оммавий ахборот воситалари Ўзбекистон миллий терма жамоасининг тарихий ютуғини кенг ёритиб, жаҳон чемпионатидаги иштироки, янада кўп ўзбекистонлик ёшларни футбол билан шуғулланишга илҳомлантиришини таъкидламоқда.