ДУШАНБЕ, 30 июль. /“Дунё” АА/. Тожикистоннинг “Avesta” ахборот агентлигида Ўзбекистон ва Қирғизистон ўртасидаги экологик ҳамкорликнинг янги босқичи ва истиқболларига бағишланган мақола эълон қилинди, деб хабар бермоқда “Дунё” АА мухбири.

Нашрда таъкидланганидек, Марказий Осиёдаги иқлим ўзгариши, сув ресурсларининг қисқариши ва трансчегаравий экологик таҳдидлар минтақа давлатларидан янада яқин ҳамкорликни талаб этмоқда. Ушбу контекстда икки мамлакатнинг атроф-муҳитни муҳофаза қилиш соҳасидаги алоқалари изчил ривожланиб, сифат жиҳатидан янги босқичга чиқмоқда.

Материалда ёзилишича, қирғизистонлик ёшлар учун Ўзбекистондаги “Green University”да алоҳида грант ўринларини ажратиш бўйича тегишли меморандум имзоланган. Шу билан бирга, қўшма тадбирлар ўтказилаётгани, Ғарбий Тянь-Шань ва Помир-Олай биохилма-хиллигини сақлаш бўйича халқаро ва минтақавий лойиҳалардаги ўзаро муносабатлар ҳамкорликни фаоллаштиришда муҳим қадам бўлди.

“Тошкент ва Бишкекнинг иқлим ўзгариши, сув хавфсизлиги, “яшил” иқтисодиётни ривожлантириш ва илмий инновациялар соҳасидаги қўшма ташаббуслари бутун Марказий Осиёнинг экологик барқарорлигини таъминлашда муҳим аҳамиятга эга”, – дея хулоса қилинган нашрда.