АНҚАРА, 30 июль. /“Дунё” АА/. Анқара инқирозлар ва сиёсат тадқиқотлари маркази (АНКАСАМ) раҳбари, профессор Меҳмет Сейфеттин Эрол “Дунё” ААга Ўзбекистон Президенти Шавкат Мирзиёевнинг Қозоғистонга амалий ташрифи ҳамда Остонада бўлиб ўтаётган “Келажак ўйинлари” учинчи халқаро мусобақасининг тантанали очилиш маросимидаги иштироки юзасидан ўз фикр-мулоҳазаларини билдирди:

– Ўзбекистон Президенти Шавкат Мирзиёевнинг Остонага ташрифи Марказий Осиё халқаро кун тартибини босқичма-босқич кенгайтираётган даврга тўғри келди. Агар яқин-яқингача минтақа биринчи навбатда энергетика, логистика ва хавфсизлик масалалари билан боғланиб келган бўлса, бугунги кунда рақамли технологиялар, инновациялар, таълим ва ёшлар ташаббусларига тобора кўпроқ эътибор қаратилмоқда. Айнан шу нуқтаи назардан учинчи “Келажак ўйинлари”нинг ўтказилиши алоҳида аҳамият касб этади.

Очилиш маросимида Қозоғистон, Ўзбекистон, Қирғизистон ва Тожикистон президентлари иштирок этди. Россия Президенти Владимир Путин иштирокчиларга видеомурожаат йўллади. Бундай юқори даражадаги иштирок “Келажак ўйинлари”нинг спорт, технологиялар ва гуманитар ҳамкорлик масалаларини бирлаштиришга қодир халқаро платформа сифатида қаралаётганидан далолат беради.

Мусобақа форматининг ўзи замонавий тенденцияларни акс эттиради. “Phygital” классик спорт турларини рақамли технологиялар билан уйғунлаштириб, ёш авлод учун янги мусобақа моделини яратмоқда. Бундай ёндашув нафақат спортни ривожлантириш, балки рақамли иқтисодиётда талаб юқори бўлган янги компетенцияларни шакллантириш ҳақида ҳам сўз юритиш имконини беради.

Қозоғистон учун ушбу турнирни ўтказиш ўз халқаро имижини мустаҳкамлаш сиёсатининг давоми бўлмоқда. “EXPO–2017”, Бутунжаҳон кўчманчилар ўйинлари ва йирик сиёсий форумлардан сўнг Остона анъанавий дипломатияга эмас, балки келажак технологияларига йўналтирилган навбатдаги тадбирга мезбонлик қилмоқда. Бу Қозоғистонга янги форматдаги халқаро тадбирларни ўтказиш учун Евроосиёнинг асосий майдонларидан бири сифатидаги ўрнини босқичма-босқич мустаҳкамлаш имконини бермоқда.

Ўзбекистон учун ҳам Президент Шавкат Мирзиёевнинг очилиш маросимидаги иштироки муҳим аҳамиятга эга. Мамлакат рақамлаштириш, ИТ-индустриясини ривожлантириш, сунъий интеллект соҳаси ва ёш мутахассисларни тайёрлашга фаол сармоя киритмоқда. Шу маънода “Келажак ўйинлари”га бўлган қизиқиш мамлакатда амалга оширилаётган ички ўзгаришларга тўла мос келади.

Ўзбекистон вакиллари мазкур турнирда фижитал-футбол, лазертаг ва рақс йўналишларида иштирок этади. Бу мамлакатнинг рақамли технологиялар ва жисмоний тайёргарлик уйғунлашган спортнинг янги йўналишларида муносиб ўрин эгаллашга интилаётганини кўрсатади.

Ўзбекистон Президенти 2024 йилда Қозон шаҳрида бўлиб ўтган биринчи “Келажак ўйинлари”нинг очилиш маросимида иштирок этган эди, энди эса Остонадаги турнирнинг очилишида ҳам қатнашмоқда. Бундай ёндашув ушбу лойиҳага бир марталик тадбир сифатида эмас, балки узоқ муддатли халқаро ташаббус сифатида қаралаётганидан далолат беради.

Бугунги кунда айнан шундай лойиҳалар минтақавий ҳамкорликнинг янги воситасига айланиб бормоқда. Марказий Осиё нафақат иқтисодий ҳамкорликка, балки технологиялар, инновациялар ва инсон капиталини биргаликда ривожлантиришга асосланган ўз кун тартибини босқичма-босқич шакллантирмоқда.