ТЕҲРОН, 27 апрель. /“Дунё” АА/ Теҳрон Вашингтонга асосий масалаларни аниқлаш ва ядровий мавзу муҳокамасини кейинги босқичга кўчиришни назарда тутувчи босқичма-босқич мулоқот форматини таклиф қилди, деб хабар бермоқда “Дунё” АА мухбири “Axios” порталига таяниб.

Манбага кўра, Эрон томони биринчи навбатда ҳарбий эскалацияни тўхтатиш, Эрон ва унинг минтақадаги иттифоқчи кучлари учун хавфсизлик кафолатларини ишлаб чиқишга эътибор қаратишни таклиф қилмоқда. Жаҳон нефть таъминоти учун стратегик муҳим йўналиш бўлган Ҳурмуз бўғозини очиш масаласи алоҳида банд сифатида кўриб чиқилмоқда.

Қайд этилишича, Эрон режаси уч босқични ўз ичига олади: можарони тўхтатиш ва хавфсизлик кафолатларини яратиш, Ҳурмуз бўғозини бошқариш механизмларини муҳокама қилиш ҳамда шундан кейингина Эрон ядровий дастури масалаларига қайтиш. Шу билан бирга, Теҳрон ядровий масалани муҳокама қилиш фақат дастлабки икки банд бўйича келишувга эришилгандан кейингина мумкинлигини таъкидламоқда.

“Axios” маълумотларига кўра, Вашингтонда бу ташаббусга эҳтиёткорлик билан қарайди. Америка расмийлари Ҳурмуз бўғози блокадасини бекор қилиш ва Эронга босим ўтказишни тўхтатиш АҚШнинг музокаралардаги позициясини заифлаштириши мумкин, деб ҳисоблайди. Гап асосий талаблар, жумладан, уранни бойитишни чеклаш ва Эроннинг бойитилган материал захираларини мамлакатдан ташқарига олиб чиқиш ҳақида бормоқда.

Дипломатик боши берк кўча фонида АҚШ президенти Дональд Трамп миллий хавфсизлик жамоаси билан йиғилиш ўтказди. Муҳокама чоғида Эронга нисбатан кейинги қадамлар ва мумкин бўлган босим сценарийлари кўриб чиқилди.

Президент Вашингтон музокара делегацияларини узоқ хорижий сафарларга, жумладан, илгари Покистонда муҳокама қилинган маслаҳатлашувларга юборишни режалаштирмаётганини ва музокараларнинг чекланган форматда ўтказилишига рухсат беришини айтди.

Аввалроқ, америкалик музокарачилар Стивен Уиткофф ва Жаред Кушнернинг музокараларнинг навбатдаги раунди ўтказилиши керак бўлган Исломободга ташрифи бекор қилингани хабар қилинганди.

Айни пайтда Ливан жанубида Исроил ва “Ҳизбуллоҳ” ҳаракати ўртасида ҳарбий тўқнашувлар давом этмоқда. BBC маълумотларига кўра, Исроил томони Ливан ҳудудидаги объектларга янги зарбалар бериб, ҳаракат аъзолари ва инфратузилмани йўқ қилганини маълум қилган.

Исроил ҳарбийларининг таъкидлашича, операциялар хавфсизликка таҳдидларнинг олдини олишга қаратилган, “Ҳизбуллоҳ” эса бунга жавобан жавоб қайтармоқда. Расмий сулҳга қарамай, вақтинчалик тинчлик келишуви беқарор бўлиб қолмоқда ва мунтазам равишда бузилишлар билан кечмоқда.

“AFP” агентлиги сурати