ЛОНДОН, 2 февраль. /“Дунё” АА/. “Ўзбекистон темир йўллари” АЖ Испаниянинг “Talgo” компанияси билан 10 йилга шартнома имзолади, деб хабар бермоқда “Дунё” АА мухбири.

Мазкур келишув республикадаги мавжуд олтита “Talgo-250” русумли тезюрар поездлар паркига техник хизмат кўрсатишни кўзда тутади.

“International Railway Journal” нашрининг ёзишича, шартноманинг умумий қиймати қарийб 80 миллион еврони ташкил этади. Ўзбекистонда “Talgo-250” поездлари 1520 мм кенгликдаги темир йўл изларида соатига 230 километр тезликда ҳаракатланмоқда.

Ушбу поездларнинг техник имкониятлари соатига 275 километргача тезликда ҳаракатланиш имконини беради ва улар “Talgo” компаниясининг пассив қиялик технологияси билан жиҳозланган.

Ўзбекистон ва “Talgo” ўртасидаги ҳамкорлик 2009 йилда бошланган бўлиб, дастлабки иккита поезд 2011 йилда фойдаланишга топширилган эди. Кейинчалик, 2017 ва 2021 йилларда ҳам янги таркиблар етказиб берилди.

Ҳозирги кунда Ўзбекистон темир йўллари тизимида барча олтита “Talgo-250” поезди 11 та вагондан иборат тўлиқ таркибда йўловчиларга хизмат кўрсатмоқда. Янги имзоланган 10 йиллик шартнома тезюрар поездларнинг хавфсиз ва узлуксиз ҳаракатланишини таъминлашда муҳим босқич бўлиб хизмат қилади.