ЛОНДОН, 7 январь. / “Дунё” АА/. Буюк Британиянинг оммабоп “London Post”  нашрида “Ўзбекистон ўзининг илк миллий сунъий интеллект тизимини тақдим этди: “BONU AGI” сарлавҳали мақола эълон қилинди, деб хабар қилмоқда “Дунё” АА мухбири.

“Ўзбекистон мамлакатдаги биринчи сунъий интеллект тизими — “BONU AGI”ни ишга тушириш орқали рақамли мустақиллик сари муҳим қадам ташлади. Ушбу лойиҳа глобал сунъий интеллект платформаларини шунчаки жорий этишдек кенг тарқалган амалиётдан воз кечиб, бунинг ўрнига Ўзбекистоннинг маданий, ижтимоий ва тарихий контекстига асосланган моделни таклиф этади”, - деб ёзган муаллиф.

Нашрда қайд этилишича, бугунги кунда фойдаланилаётган сунъий интеллект (СИ) тизимларининг аксарияти минимал фарқланиш билан турли жамиятларда ишлашга мўлжалланган универсал тузилмалар асосида қурилган. Бундай моделлар самарали бўлса-да, улар кўпинча бир муҳим жиҳатни эътибордан четда қолдиради: реал дунёда қарор қабул қилиш кўп жиҳатдан маданий нормаларга, жамоавий хотирага, тил моделларига ва миллий тажрибага боғлиқ. “BONU AGI” сунъий интеллекти эса маданий вакуумда мавжуд бўлмаслиги керак деган ғоя асосида яратилган.

“BONU AGI” фойдаланувчи сўровларини маҳаллий ижтимоий ва маданий хусусиятлар призмаси орқали талқин қилади. Бу тизимга Ўзбекистон аҳолисининг қандай мулоқот қилиши, қандай фикр юритиши ва саволларни қандай шакллантиришини яхшироқ акс эттириш имконини беради. Шу маънода, “BONU AGI” мавжуд хорижий платформаларнинг маҳаллийлаштирилган нусхаси эмас, балки контекстуал хабардорликка устуворлик берадиган СИ ишлаб чиқишдаги муқобил ёндашувдир. Лойиҳа Бахтиёр Бобохонов, Сардорбек Турсунбеков ва Отабек Сиддиқов каби экспертлар томонидан ишлаб чиқилди”,- дея таъкидланган мақолада.

Мақола хулосасида, “BONU AGI” шунчаки янги рақамли маҳсулотдан кўра кўпроқ нарсани англатади. У сунъий интеллектнинг миллий контекстга қараб қандай шаклланиши мумкинлиги ҳақида дастлабки намунани тақдим этади ва ўз маданий ҳамда ижтимоий ўзлигини акс эттирувчи СИ тизимларини ишлаб чиқишга интилаётган бошқа давлатлар учун мўлжал бўлиб хизмат қилиши мумкин”, - деб фикр билдирилган.