ТОШКЕНТ, 11 июнь. /“Дунё” АА/. Бугун Ўзбекистон ташқи ишлар вазири Бахтиёр Саидов Жазоир тоғ-кон саноати вазири Мурод Ханифи билан учрашди, деб хабар бермоқда “Дунё” АА мухбири.

“Жазоир тоғ-кон саноати вазири Мурод Ханифи жаноблари билан учрашувимиз давомида минерал ресурслар соҳасидаги ҳамкорлик истиқболларини атрофлича муҳокама қилдик, – деб ёзди Ўзбекистон ТИВ раҳбари ўзининг telegram-каналида. – Ўзбекистон ва Жазоир табиий бойликлар, геология-қидирув ишлари ҳамда тоғ-кон саноатини ривожлантириш бўйича катта салоҳиятга эга мамлакатлар ҳисобланади. Шу нуқтайи назардан, мазкур соҳани икки томонлама ҳамкорликнинг янги ўсиш нуқталаридан бири сифатида кўрамиз.

Суҳбат чоғида геология-қидирув ишларини биргаликда амалга ошириш, истиқболли конларни ўзлаштириш, қўшма корхоналар ташкил этиш, минерал хомашёни чуқур қайта ишлаш ва юқори қўшилган қийматли маҳсулотлар ишлаб чиқариш имкониятлари юзасидан фикр алмашдик”.

“Дунё” АА олган сурат