МОСКВА, 26 март. /“Дунё” АА/. Москва шаҳрида тўқимачилик саноатининг йирик халқаро кўргазмаларидан бири – “Интерткань – 2026” бўлиб ўтди, деб хабар бермоқда “Дунё” АА мухбири.

Мазкур тадбирда Ўзбекистон делегацияси “Made in Uzbekistan” бренди остида ягона миллий экспозиция билан иштирок этди.

Кўргазма доирасида Вазирлар Маҳкамаси ҳузуридаги Енгил саноатни ривожлантириш агентлиги ҳамда “Ўзтўқимачиликсаноат” уюшмаси томонидан 180 квадрат метр майдонда ташкил этилган миллий павильонда 20 та етакчи маҳаллий корхонанинг маҳсулотлари намойиш қилинди. Шунингдек, Ўзбекистоннинг яна 8 та компанияси алоҳида стендлар билан иштирок этди.

Таъкидланишича, мазкур кўргазмада иштирок этиш республика тўқимачилик саноатининг ишлаб чиқариш салоҳиятини намоён этиш, экспорт имкониятларини кенгайтириш ва янги ишбилармонлик алоқаларини ўрнатишга хизмат қилади.

Ўзбекистоннинг Россиядаги элчихонаси миллий компанияларга маҳсулотларни ташқи бозорларга илгари суриш, ҳамкорлик алоқаларини мустаҳкамлаш ҳамда “Made in Uzbekistan” брендининг халқаро майдонда танилишини оширишда амалий ёрдам кўрсатди.

“Интерткань” кўргазмаси Россия ва МДҲ мамлакатларидаги энг йирик халқаро платформалардан бири бўлиб, унда тўқимачилик саноати учун ускуналар, хомашё ва тайёр маҳсулотлар кенг намойиш этиб келинмоқда.