БАҒДОД, 1 февраль. /“Дунё” АА/. “Baghdad International Fair” халқаро кўргазмасида иштирок этиш учун Ўзбекистон бизнес-делегацияси махсус чартер рейс билан Тошкентдан Ироқ пойтахтига етиб келди, деб хабар бермоқда “Дунё” АА мухбири.

Делегация таркибидан Ўзбекистон Савдо-саноат палатаси, Инвестициялар, саноат ва савдо вазирлиги, Экспортёрлар уюшмаси, Фармацевтика, ўсимликлар карантини, заргарлик саноати агентликлари ҳамда “Ўзавтосаноат”, “Ўзчармсаноат”, “Ўзэлтехсаноат” уюшмалари вакиллари, шунингдек, 200 нафарга яқин тадбиркор ва ОАВ ходимлари жой олган.

Таъкидлаш жоизки, жорий йилнинг 1–7 февраль кунлари бўлиб ўтаётган нуфузли Бағдод кўргазмасида Ўзбекистон илк бор “Фахрий меҳмон” мақомида иштирок этмоқда.

Ташриф дастуридан “Ироқ–Ўзбекистон бизнес-форуми” ҳамда B2B ва B2G форматларидаги музокаралар ўрин олган. Ўзбекистонлик тадбиркорлар "Made in Uzbekistan" миллий бренди остидаги махсус павильонда ўз маҳсулотларини намойиш этиш билан бирга, Ироқнинг улгуржи бозорларини ўрганиш, маҳаллий компаниялар билан учрашувлар ўтказиш ва маҳсулотларни қабул қилиш пунктлари ҳамда омборларни кўздан кечиришни режалаштирганлар.

Экспертларнинг фикрича, ушбу кенг кўламли ташриф икки давлат ишбилармон доиралари ўртасида тўғридан-тўғри мулоқотни йўлга қўйиш ва ўзаро манфаатли лойиҳаларни амалга оширишда муҳим аҳамият касб этади. Бу қадам ўзбек маҳсулотларининг Ироқ бозорига экспорти ҳажмини ошириш ва икки томонлама савдо-иқтисодий ҳамкорликни сифат жиҳатидан янги босқичга олиб чиқишга хизмат қилади.