ИСЛОМОБОД, 11 июль. /“Дунё” АА/. Покистоннинг “Discover Pakistan” давлат телеканалида “Ўзбек футболи: орзу, сабр ва ғурур тарихи” номли ҳужжатли фильм намойиш этилди, деб хабар бермоқда “Дунё” АА мухбири.

Покистонлик томошабинлар мазкур фильм орқали футбол бўйича Ўзбекистон миллий терма жамоасининг жаҳон чемпионатига қай тариқа йўл олгани ҳақида бохабар бўлди. Ҳужжатли асарда Ўзбекистон футболи тарихи, шаклланиши ва тараққиёти кенг ёритилган.

Фильмда ўзбек футболининг ХХ аср бошидаги илк ўйинларидан тортиб, терма жамоанинг жаҳон чемпионатида иштирок этишигача бўлган йўлни босиб ўтган кишилар ҳақида ҳам кўплаб маълумотлар келтирилган.

Кино лойиҳада қаҳрамонлар сифатида таниқли ўзбек спортчилари, ҳозирда Ўзбекистон миллий терма жамоасида ўйнаётган футболчилар, мураббийлар, ҳакамлар ва журналистлар иштирок этган.

Ҳужжатли фильм охирида таъкидланганидек, Ўзбекистон футболи – бу шунчаки орзунинг рўёбга чиқиши эмас. Бу унга йиллар давомида ишонган, умид билан курашган ва ўз ҳиссасини қўшган авлодларнинг муносиб мукофотидир”.