МОСКВА, 27 июль. /“Дунё” АА/. Россиянинг нуфузли “Независимая газета” кундалик нашрида “Бишкек ва Тошкент муштарак келажакни барпо этмоқда” сарлавҳали мақола эълон қилинди, деб хабар бермоқда “Дунё” АА мухбири.

Унда Ўзбекистон ва Қирғизистон ўртасидаги иқтисодий ва сиёсий муносабатларда салмоқли натижаларга эришилгани қайд этилган.

Қайд этилишича, Шавкат Мирзиёев ташаббуси билан ташкил этилган, бошланғич капитали 50 миллион АҚШ долларини ташкил этувчи Ўзбекистон–Қирғизистон тараққиёт жамғармаси томонидан тўқимачилик, энергетика ва логистика каби муҳим соҳаларда 37 та лойиҳа маъқулланди. Бу жамғарма томонидан молиялаштиришни жадаллаштириш ва инвестиция портфелини кенгайтиришга қаратилган амалий саъй-ҳаракатлар натижасида мумкин бўлди.

Мақолада стратегик аҳамиятга эга бўлган икки йирик лойиҳа — “Хитой – Қирғизистон – Ўзбекистон” темир йўли ҳамда “Қамбарота ГЭС-1” қурилишига алоҳида эътибор қаратилган. Ушбу ташаббуслар нафақат транспорт ва энергетика алоқаларини яхшилайди, балки минтақанинг янги иқтисодий географияси рамзига айланади. Муаллифнинг таъкидлашича, ушбу лойиҳаларнинг муваффақияти икки мамлакатнинг биргаликдаги саъй-ҳаракатлари ва манфаатлар мувозанатига боғлиқдир.

Мақола муаллифи Стратегик ва минтақалараро тадқиқотлар институти директори Элдор Ариповнинг сўзларига таяниб, икки мамлакат муносабатлари мустақиллик тарихидаги энг гуллаб-яшнаган даврни бошдан кечираётганини қайд этади. Унинг таъкидлашича, давлат раҳбарларининг сиёсий иродаси туфайли икки томонлама кун тартибидаги принципиал масалалар ўз ечимини топди. “Аслида, сўнгги ўн йилликлар давомида илк бор Ўзбекистон ва Қирғизистон ўз куч-ғайратини ўтмиш меросини енгиб ўтишга эмас, балки муштарак келажакни биргаликда барпо этишга қаратиш имкониятига эга бўлдилар”, — дейди Элдор Арипов.

Хулоса қилар экан, муаллиф яқин-яқингача икки томонлама муносабатларда ёпиқ ўтказиш пунктлари ва баҳсли чегара ҳудудлари асосий ўрин тутганини эслатади. Бугунги кунда эса эътибор марказида саноат корхоналари, транспорт коридорлари, энергетика ва капитал ҳаракати турмоқда. Муносабатларнинг бугунги муваффақияти томонларнинг муаммоларни ҳал қилиш салоҳиятига эмас, балки очилаётган имкониятлардан биргаликда самарали фойдалана олиш маҳоратига боғлиқдир. Президент Шавкат Мирзиёевнинг бўлажак ташрифи эса ушбу имкониятларнинг қайси бири биринчи бўлиб реал шартномалар ва ишлаб турган корхоналарга айланишини кўрсатиб беради.