ВАРШАВА, 27 июль. /“Дунё” АА/. Польша пойтахтида “IT Park Uzbekistan” томонидан IT ва бизнес жараёнлари аутсорсинги йўналишида конференция ташкил этилди, деб хабар бермоқда “Дунё” АА мухбири.

Тадбирда “HSBC”, “Netflix”, “Deloitte”, “Toshiba”, “Comarch” ва бошқа 40 дан ортиқ нуфузли халқаро компаниялар ҳамда оммавий ахборот воситалари вакиллари иштирок этди.

Вакилларимиз хорижий инвесторлар учун яратилган имкониятлар, жумладан, IT-компанияларнинг мамлакатимизда фаолият бошлашида дастлабки харажатларни камайтиришга қаратилган “Zero Risk” дастурини тақдим қилди.

Мулоқот давомида юртимизда IT ва бизнес жараёнлари аутсорсинги соҳасидаги истиқболли лойиҳалар ҳақида ҳам сўз юритилди.

Конференцияда қатор халқаро компаниялар вакиллари Ўзбекистонда ваколатхона очиш, маҳаллий IT-мутахассисларни жалб этиш ҳамда қўшма лойиҳаларни амалга оширишга катта қизиқиш билдирди.