ТЕЛЬ-АВИВ, 12 июль. /“Дунё” АА/. Исроилнинг оммабоп “Канал 14” телеканали ҳамда Бутунжаҳон бухоро яҳудийлари конгрессининг “Менора” газетасида Ўзбекистон ва Исроил ўртасидаги истиқболли ҳамкорликка бағишланган материаллар эълон қилинди, деб хабар бермоқда “Дунё” АА мухбири.

Мақолада қайд этилишича, Марказий Осиёнинг аҳолиси энг зич яшайдиган мамлакати бўлган Ўзбекистон изчил иқтисодий ислоҳотлар ва янги фойдали қазилма конларининг очилиши фонида Исроил технологиялари, қишлоқ хўжалиги ҳамда инновациялари учун ўз эшикларини кенг очмоқда.

Исроил ОАВ юртимиздаги йирик “Global Textile” тўқимачилик корхонаси фаолиятига тўхталиб, исроиллик шериклар билан ҳамкорлик пахтачиликда замонавий томчилатиб суғориш тизимларини жорий этиш имконини берганини алоҳида эътироф этган.

Шунингдек, материалларда Тошкент марказида халқаро стартаплар учун ташкил этилган янги технопарк хусусида сўз юритилган. Унда Исроил истиқболли ҳамкор сифатида кўрилаётгани ҳамда маҳаллий вакиллар исроиллик компанияларни юртимизда ўтказилаётган халқаро танловлар ва лойиҳаларга жалб этишга тайёр экани қайд этилган.

“Менора” газетасининг ёзишича, бугунги кунда Тошкент ўзини Марказий Осиёнинг янги молиявий маркази сифатида намоён этмоқда. Шу муносабат билан, Ўзбекистоннинг олмос ва юқори технологиялар индустрияси Исроил инвестицияларини жалб қилишда энг устувор йўналишлардан бири сифатида баҳоланмоқда.