ТОШКЕНТ, 23 июнь. /“Дунё” АА/. 2026 йилнинг январь-апрель ойларида Ўзбекистоннинг экспорт ҳажми қарийб 10 миллиард АҚШ долларини ташкил этди, деб хабар бермоқда “Дунё” АА мухбири.

Миллий статистика қўмитаси маълумотларига кўра, мазкур даврида Россия Ўзбекистон экспортининг энг йирик йўналишига айланди — ушбу мамлакатга 1,5 миллиард долларлик маҳсулот етказиб берилди. Иккинчи ўриндан 919,6 миллион долларлик кўрсаткич билан Хитой, учинчи ўриндан эса экспорт ҳажми 643,7 миллион АҚШ долларига етган Афғонистон жой олди.

Ўзбекистон экспортида юқори улушга эга бўлган мамлакатлар қаторидан, шунингдек, Франция - 498,6 миллион доллар, Қозоғистон - 425,5 миллион доллар ва Туркия - 361,4 миллион доллар жой олди.

Бирлашган Араб Амирликларига амалга оширилган экспорт 265,5 миллион АҚШ долларини, Қирғизистонга — 254,2 миллион АҚШ долларини, Тожикистонга эса — 213,3 миллион АҚШ долларини ташкил этди.

Ўзбекистон экспортининг энг йирик ўнта йўналишини Америка Қўшма Штатлари якунлаб берди — жорий йилнинг тўрт ойи давомида ушбу мамлакатга 122,5 миллион АҚШ долларлик маҳсулот экспорт қилинди.