НЬЮ-ЙОРК, 2 июль. /“Дунё” АА/. БМТ Бош котиби ёрдамчиси Чандру Раманатан энг йирик донорлар – АҚШ ва Хитойнинг бадалларни тўлашни кечиктираётгани сабабли ташкилот сентябрь ойидаёқ ликвидлик танқислигига дуч келиши мумкинлигини маълум қилди, деб хабар бермоқда “Дунё” АА мухбири “UNifeed”га таяниб.

Раманатаннинг қайд этишича, БМТ бюджети касса узилишлари туфайли босим остида қолмоқда, бунда ҳатто тасдиқланган харажатларни ҳам тўлиқ молиялаштириб бўлмаяпти.

Унга кўра, 2026 йилга мўлжалланган тинчликни сақлаш операциялари бюджети 5,1 миллиард долларни ташкил этади, бу ўтган йилгига нисбатан 9,7 фоизга камдир. Ходимларнинг қисқаришини ҳисобга олганда, харажатларнинг реал камайиши қарийб 14 фоизга етади.

Ташкилотнинг молиявий аҳволи кўп жиҳатдан энг йирик донорларга боғлиқ. БМТ мунтазам бюджетининг тахминан 42 фоизи АҚШ ва Хитой ҳиссасига тўғри келади.

Хитойнинг мунтазам бюджетдан қарздорлиги 428 миллион долларни, тинчликпарварлик бадаллари бўйича қарзи эса яна 65 миллион долларни ташкил этади. БМТ вакилининг фикрича,  ушбу 428 миллион доллар қарз сентябрь ойида ёки ундан олдинроқ тўланиши кутилмоқда.

АҚШ билан боғлиқ вазият эса анча мураккаблигича қолмоқда: мунтазам бюджет бўйича қарз 2 миллиард доллардан, тинчликпарварлик операциялари бўйича эса қарийб 1,7–1,8 миллиард доллардан ошади.

БМТ ҳисоб-китобларига кўра, тушумларнинг кечикиши сентябрь ойидаёқ ликвидлик танқислигига олиб келиши мумкин, йил охирига келиб эса ташкилот даврни деярли молиявий захираларсиз якунлаш хавфи остида қолади.