ТОШКЕНТ, 19 сентябрь. /“Дунё” АА/. Ўзбекистон Тоғ-кон саноати ва геология вазири Бобир Исломов “Mangold Consulting GmbH” кузатув кенгаши раиси Клаус Мангольд бошчилигидаги Германия делегацияси билан учрашув ўтказди, деб хабар бермоқда “Дунё” АА мухбири.

Учрашув чоғида минерал-хомашё ресурсларини ўзлаштириш, саноат кооперацияси, истиқболли қўшма лойиҳалар, шунингдек, технологик ва инвестициявий ҳамкорликни кенгайтириш масалалари кўриб чиқилди.

Нашрнинг қайд этишича, Ўзбекистон ва Германия ўртасидаги иқтисодий ҳамкорлик стратегик минерал ресурсларни ўзлаштириш, уларни чуқур қайта ишлаш ва давлат активларидан самарали фойдаланиш каби йўналишларда янги мазмун билан бойимоқда. Ушбу соҳалардаги мулоқотнинг умумий мақсади мавжуд ресурслардан юқори иқтисодий самарадорликни таъминлаш, замонавий технологиялар ва илғор бошқарув тажрибасини жалб этишдан иборатдир.

Учрашув давомида Ўзбекистон технологик металлар комбинати ўз ишлаб чиқариш имкониятлари, асосий фаолият йўналишлари ва стратегик минерал ресурсларни қайта ишлаш бўйича лойиҳаларини тақдим этди.

Ўз навбатида, “Mercedes-Benz AG” вакиллари хомашё ресурслари соҳасидаги ўзбек-герман мулоқотига бағишланган тақдимот билан чиқиш қилдилар. Томонлар истиқболли йўналишларни биргаликда ўрганиш ва ушбу соҳада ҳамкорликни давом эттиришга келишиб олдилар.

Маълум қилинишича, учрашувнинг Ўзбекистон учун аҳамияти мамлакат ичида минерал ресурсларни чуқур қайта ишлаш ва юқори қўшилган қийматга эга маҳсулотлар ишлаб чиқариш имкониятлари билан боғлиқ. Германия компанияларининг технологик тажрибаси ва инвестициявий салоҳияти миллий саноатнинг ишлаб чиқариш қувватларини кенгайтириш, малакали иш ўринларини яратиш ва экспорт таркибини диверсификация қилишга хизмат қилиши мумкин. Германия бизнеси учун эса бундай шериклик хомашё таъминоти манбаларини кенгайтириш ва узоқ муддатли ишлаб чиқариш алоқаларини шакллантириш имконини беради.