ИСЛОМОБОД, 3 март. /“Дунё” АА/. «Покистоннинг «Daily Spokesman» газетаси, «The Diplomatic Insight», «Sub News», Daily Sub News» ва «Khyber mail» электрон нашрларида Ўзбекистон Президенти Шавкат Мирзиёевнинг Вашингтон шаҳрида бўлиб ўтган Тинчлик кенгашининг биринчи саммитидаги иштирокига бағишланган мақола эълон қилинди, деб хабар бермоқда “Дунё” АА мухбири.

«Президент Шавкат Мирзиёев АҚШ Президенти Дональд Трампнинг таклифига биноан 17–19 февраль кунлари Вашингтон шаҳрига ишчи ташриф билан бориб, Тинчлик кенгашининг биринчи саммитида иштирок этди, – дейилади мақолада. – Ушбу ташриф доирасида Ўзбекистон ва АҚШ ўртасида иқтисодий ҳамкорликни мустаҳкамлаш бўйича ҳам муҳим келишувларга эришилди».

Таъкидланганидек, Тинчлик кенгаши — АҚШ Президенти Дональд Трамп томонидан Ғазо сектори бўйича тинчлик режаси доирасида илгари сурилган ташаббус асосида ташкил этилган ҳукуматлараро ташкилотдир. Ушбу режа 2025 йил ноябрь ойида БМТ Хавфсизлик Кенгаши томонидан маъқулланган. Ташкилотни тузиш ва унинг фаолияти Яқин Шарқ минтақасидаги кескинлик хавфини камайтириш, шунингдек, Ғазо секторида иқтисодий ва ижтимоий тикланиш учун қулай шароит яратишга қаратилган.

Маълум қилинганидек, 19 февраль куни Вашингтон шаҳрида АҚШ Президенти бошчилигидаги Тинчлик кенгашининг биринчи йиғилиши бўлиб ўтди. Унда Ғазо секторини тиклаш, гуманитар ёрдам кўрсатиш, шунингдек, минтақада тинчлик ва барқарорликни таъминлаш масалалари муҳокама қилинди.

«Тинчлик кенгаши саммитида сўзга чиққан Ўзбекистон Президенти мазкур ташаббусни қўллаб-қувватлаб, уни муваффақиятли амалга оширишда амалий иштирок этиш нияти қатъий эканини таъкидлади. Шу билан бирга, Ғазони ташқи бошқаришнинг ҳар қандай механизми албатта сектор аҳолисининг ички қўллаб-қувватлашига таяниши лозимлиги алоҳида қайд этилди. Барча томонларнинг мувофиқлаштирилган саъй-ҳаракатлари можародан кейинги жараён барқарорлигини таъминлаш ва Ғазони тез фурсатда тиклаш учун шароит яратиш имконини бериши таъкидланди. Давлат раҳбари Ўзбекистоннинг Ғазо секторида турар-жойлар, болалар боғчалари, мактаблар ва шифохоналар қурилишига муносиб ҳисса қўшишга тайёр эканини билдирди», – деб ёзган Покистон матбуоти.

Фаластин ва Ғазо сектори масаласи ўнлаб йиллар давомида халқаро кун тартибининг энг долзарб мавзуларидан бири бўлиб келмоқда ва ҳанузгача самарали ечим топмаган. Тинчлик кенгашининг ташкил этилиши сўнгги йилларда ушбу масалани ҳал қилишга қаратилган илк жиддий уриниш ҳисобланади. Ўзбекистоннинг мазкур янги халқаро ташкилот таъсисчи давлатлари қаторига таклиф этилиши эса унинг жаҳон сиёсатидаги ўрни ва нуфузи ортиб бораётганининг ёрқин далилидир.

Ташрифнинг иқтисодий жиҳатига тўхталадиган бўлсак, сўнгги йилларда Ўзбекистон ва АҚШ ўртасида иқтисодий ҳамкорлик изчил равишда кенгайиб бораётганини, аввал мавжуд бўлган стратегик шериклик муносабатлари тикланаётганини қайд этиш лозим.

Нашрларда ёзилганидек, Ўзбекистон Президентининг Вашингтонга амалга оширган ушбу ташрифи ва Тинчлик кенгашининг биринчи саммитидаги иштироки этиши ҳам нуфузий, ҳам иқтисодий жиҳатдан муҳим аҳамият касб этади.

Мақолалар «Тинчлик кенгаши фаолиятида фаол иштирок этиш нафақат Ўзбекистоннинг халқаро майдондаги таъсири кучайганини кўрсатади, балки глобал муаммоларни ҳал этишдаги имкониятларини кенгайтириб, мамлакатнинг халқаро нуфузи янада юксалишига хизмат қилади», – деган сўзлар билан якунланган».