АНҚАРА, 24 февраль. /“Дунё” АА/. Туркия оммавий ахборот воситалари АҚШда бўлиб ўтган Тинчлик кенгашининг биринчи саммити доирасида Ўзбекистон Президенти томонидан илгари сурилган ташаббусларга алоҳида эътибор қаратди, деб хабар қилмоқда “Дунё” АА мухбири.

Хусусан, Туркия телерадиокорпорациясининг “ТРТ-Аваз” портали давлатимиз раҳбарининг Вашингтондаги Тинчлик кенгаши йиғилишида сўзлаган нутқи ҳақида тўхталиб ўтди.

Нашрнинг ёзишича, АҚШда бўлиб ўтган Тинчлик кенгаши йиғилишида сўзга чиққан Шавкат Мирзиёев Ўзбекистон давлати Ғазони қайта тиклаш учун турар жойлар, болалар боғчалари, мактаб ва касалхоналар барпо этишга имкон қадар ҳисса қўшишга тайёр эканини билдирган.

Ўзбекистон етакчиси Ғазони тиклаш учун ташкил этилган Тинчлик кенгашининг биринчи йиғилишига мезбонлик қилгани учун АҚШ Президентига миннатдорлик билдириб, бу ташаббус Дональд Трампнинг сиёсий иродаси ва прагматизми натижаси эканини таъкидлаган.

Шунингдек, Президент Мирзиёев Тинчлик кенгашини тузиш бўйича тинчликсевар ташаббусларни қўллаб-қувватлашини ва Ўзбекистон ушбу кенгашнинг муваффақиятли фаолиятига ҳисса қўшишга тайёрлигини билдирган.

Нашрда Ўзбекистон Президентининг “Биз Янги Ғазони – иқтисодиёти фаровон, аҳоли учун муносиб турмуш шароитларига эга бўлган минтақани барпо этиш учун ушбу тарихий имкониятдан фойдаланишимиз зарур”, деб таъкидлаган сўзлари ҳам келтирилган.