БУДАПЕШТ, 20 июль. /“Дунё” АА/. Венгрия Бош вазири Петер Мадьяр мамлакат президенти лавозимига таниқли шахматчи Юдит Полгар номзодини таклиф қилиш ниятида, деб хабар бермоқда “Дунё” АА мухбири.

Ҳукумат раҳбарининг сўзларига кўра, мамлакатга жамиятни бирлаштира оладиган ва барча фуқаролар манфаатини ифодалайдиган президент зарур.

“Мамлакатимизга ҳамжиҳатлик, тинчлик ва ҳар бир венгриялик фахрланадиган президент керак. Республика президенти лавозими – бу касб ёки иш ўрни эмас, балки хизмат қилишнинг олий кўринишидир. Президентнинг вазифаси барча венгрияликларга хизмат қилиш ва уларнинг вакили бўлишдир”, – деб ёзди Бош вазир ўзининг “Facebook”даги саҳифасида.

Венгрия Бош вазири Юдит Полгар билан учрашиб, янги Конституция қабул қилингунига қадар бу лавозимни эгаллашга тайёр ёки йўқлигини билиб олишини қўшимча қилди.

Юдит Полгар шахмат тарихидаги энг муваффақиятли аёл спортчи ҳисобланади. У Эло рейтингида 2700 пунктлик маррадан ўтган ягона аёл бўлиб, 26 йил давомида аёллар ўртасидаги жаҳон рейтингини бошқариб келган, жаҳон рейтингида саккизинчи ўринга кўтарилган ва икки карра шахмат Олимпиадаси ғолиби бўлган. У аввал сиёсий фаолият билан шуғулланмаган.

Июль ойи бошида Петер Мадьяр Юдит Полгар билан шахмат ўйнаётгани акс этган суратни эълон қилган. Шундан сўнг Венгрияда спортчининг олий давлат лавозимига номзоди кўрсатилиши мумкинлиги ҳақида тахминлар пайдо бўлганди.

Амалдаги президент Тамаш Шуйок ўз ваколатларини муддатидан олдин тугатишга имкон берувчи Конституцияга киритилган ўзгартиришни имзолади. Шу билан, унинг 2029 йилда якунланиши керак бўлган ваколатлари тугатилди. Янги давлат раҳбари сайлангунига қадар бир ой давомида президент вазифасини парламент спикери Агнес Форстҳоффер бажариб туради.

Кеча фан, маданият ва спорт соҳасининг 16 нафар вакили парламент раисига мактуб йўллаб, Юдит Полгар номзодини президентликка кўрсатишни таклиф этди. Айни вақтда “Ügyvédko‘r” бирлашмаси ушбу лавозимга ҳуқуқшунос Петер Баранди номзодини илгари сурганини маълум қилди.