БУДАПЕШТ, 19 июль. /“Дунё” АА/. Венгрия Президенти Тамаш Шуйок ўз ваколатларини муддатидан олдин тугатишга имкон берувчи Конституцияга киритилган ўзгартиришни имзолади, деб хабар бермоқда “Дунё” АА мухбири “Euronews” телеканалига таяниб.

Унинг президентлик ваколатлари муддати 2029 йилда якунланиши керак бўлган. Ушбу тузатиш ташаббуси билан Венгрия Бош вазири Петер Мадьяр чиққан эди. 13 июль куни мазкур ҳужжатни парламентнинг 199 нафар депутатидан 139 нафари қўллаб-қувватлади. Ўзгаришлар кучга киргач, Тамаш Шуйокнинг ваколатлари тугатилади.

Президентнинг ўзи ушбу тузатиш мазмунига рози эмаслигини баён қилиб, уни “сиёсий ҳокимиятни суиистеъмол қилишнинг шармандали тарихий намунаси” деб атади.

Унинг сўзларига кўра, янги ўзгартириш ҳокимиятларнинг бўлиниши ва қонун устуворлиги тамойилларига зарар етказади. Венгриянинг собиқ Бош вазири Виктор Орбан ҳам ушбу қарорни танқид қилиб, бундай механизм бошқа давлат институтлари учун ҳам хавф туғдиришини баён этди.

Петер Мадьяр бундан олдин Виктор Орбаннинг иттифоқчиси ҳисобланган Тамаш Шуйок жамият ишончини йўқотганини даъво қилган эди. Душанба кунидан бошлаб президент вазифасини вақтинчалик парламент спикери Агнеш Форстхоффер бажаради. Кейинчалик парламент янги давлат раҳбарини сайлаши лозим.