БЕЛГРАД, 28 сентябрь. /“Дунё” АА/. Сербия президенти Александр Вучич навбатдан ташқари парламент сайловларида иштирок этиш ва бош вазир лавозимига даъвогарлик қилиш ниятида эканини билдириб, истеъфога чиқишини эълон қилди, деб хабар бермоқда “Дунё” АА мухбири “Balkan Insight” порталига таяниб.

Александр Вучич 2017 йилдан бери президент лавозимида ишлаб келган ва 2022 йил апрель ойида қайта сайланган эди. Унинг иккинчи муддати 2027 йилнинг ўртасида тугаши керак эди. Бироқ 2025 йил август ойидаёқ у лавозимни муддатидан олдин тарк этиш режаларини эълон қилди ва кейинчалик аниқ сана ­– 27 сентябрь куни эканини айтди.

Сентябрь бошида у Халқ мажлисини тарқатиб юборди ва парламент сайловларини 25 октябрга белгилади. Ҳукмрон Сербия тараққийпарвар партияси “Бирлашган Сербия” сайлов рўйхатини бошқариши ва ғалаба қозонган тақдирда ҳукумат раҳбари лавозимига даъвогарлик қилишини билдирди.

Халқ мажлиси раиси Ана Брнабич президент вазифасини бажарувчи бўлади.

Президентнинг истеъфоси Сербияда 2024 йил ноябрь ойида Нови-Сад шаҳридаги темир йўл вокзалида бостирма қулаши оқибатида 16 киши ҳалок бўлганидан кейин узоқ давом этган норозилик намойишлари фонида юз берди. Намойишчилар фожиа ҳолатларини тергов қилиш ва коррупцияга қарши курашни кучайтиришни талаб қилишди.

Александр Вучич даврида Сербия Россия ва Хитой билан яқин муносабатларни сақлаб қолган ҳолда, Европа Иттифоқига аъзо бўлиш бўйича музокараларни давом эттирди. Белград Европа Иттифоқининг Россияга қарши санкцияларига қўшилмади. Косово билан муносабатлар мамлакат ташқи сиёсатининг асосий масалаларидан бири бўлиб қолмоқда.

Эслатиб ўтамиз, 7–8 сентябрь кунлари Ўзбекистон Президенти Шавкат Мирзиёев Белградга ташриф буюриб, Сербия Президенти билан ўтказилган музокаралар якунида Стратегик шериклик муносабатларини ўрнатиш тўғрисида қўшма декларация ҳамда савдо, транспорт, меҳнат миграцияси, инвестициялар ва бошқа йўналишларни қамраб олган икки томонлама ҳужжатлар тўпламини имзолаган.

“AP” агентлиги сурати