ВАШИНГТОН–ТЕҲРОН, 11 май. /“Дунё” АА/. Оқ уй раҳбари Дональд Трамп АҚШ томонидан урушни тўхтатиш бўйича илгари сурилган таклифга Эрон берган жавобни “мутлақо номақбул” деб баҳолади, деб хабар бермоқда “Дунё” АА мухбири “Ахиос” порталига таяниб.

АҚШ музокараларни қайта йўлга қўйиш мақсадида таклиф билдирганидан бир неча кун ўтиб, Эрон урушни барча йўналишларда, жумладан Ливанда “Ҳизбуллоҳ” гуруҳи билан давом этаётган можарони тўхтатишга қаратилган жавобини тақдим этди.

Эрон давлат оммавий ахборот воситаларига кўра, Теҳрон ҳарбий йўқотишлар учун компенсация тўлашни талаб қилган, шунингдек, Эроннинг Ҳўрмуз бўғози устидан суверенитетини таъкидлаган. Мамлакат АҚШдан денгиз блокадасини бекор қилиш, кейинги ҳужумларни тўхтатиш бўйича кафолат бериш, санкцияларни бекор қилиш ҳамда Эрон нефтини сотишга қўйилган тақиқни олиб ташлашни ҳам талаб қилган.

АҚШ Президенти ўзининг “Truth Social” ижтимоий тармоғидаги саҳифасида шундай ёзди: “Мен ҳозиргина Эрон вакилларининг жавобини ўқидим. Менга бу ёқмайди — МУТЛАҚО НОМАҚБУЛ”.

Дональд Трамп аввалроқ Эрон билан можаро тезда якунланиши мумкинлигини билдирган эди. Бироқ Исроил Бош вазири Биньямин Нетаньяху урушни якунлаш Эроннинг бойитилган уран захираларини йўқ қилиш ва унинг бойитиш объектларини демонтaж қилмасдан мумкин эмаслигини таъкидлаган.

Эрон Президенти Масъуд Пезешкиён эса мамлакат “ҳеч қачон душман олдида бош эгмаслигини ва эҳтимолий музокаралар таслим бўлиш дегани эмаслигини” маълум қилган.

Эслатиб ўтамиз, АҚШ томонидан тақдим этилган 14 бандлик режа уранни бойитишни тўхтатиш, санкцияларни бекор қилиш ва Ҳўрмуз бўғози орқали эркин денгиз ҳаракатини таъминлашни ўз ичига олади. Айрим шартлар якуний келишувга эришилишига боғлиқ бўлиши мумкин.

Февраль ойида АҚШ ва Исроил томонидан бошланган урушни тўхтатиш ҳамда музокараларни енгиллаштириш мақсадида жорий этилган ўт очишни тўхтатиш режими айрим тўқнашувларга қарамай, асосан сақланиб қолмоқда.

“Reuters” агентлиги сурати