БЕЛГРАД, 5 сентябрь. /“Дунё” АА/. Сербиянинг “Republika” нашрида Ўзбекистон ва Сербия ўртасидаги жадал ривожланаётган стратегик шерикликка бағишланган таҳлилий мақола эълон қилинди, деб хабар бермоқда “Дунё” АА мухбири.

Нашрда қайд этилишича, Сербия Президенти Александр Вучичнинг дипломатик муносабатлар ўрнатилганининг 30 йиллигига тўғри келган Ўзбекистонга ташрифи икки мамлакатнинг яқинлашуви учун асосий туртки бўлди.

Мақолада IT, сунъий интеллект ва киберхавфсизлик соҳаларидаги технологик келишувларнинг амалий ижросига алоҳида эътибор қаратилган.

Нашр Белграднинг Европа бизнес алоқалари ҳамда Тошкент IT-секторининг ривожланаётган кадрлар ва инфратузилма салоҳиятини бирлаштирувчи “Сербияда front office — Ўзбекистонда back office” истиқболли ҳамкорлик моделини тавсифлайди. Бу эса ўзбек рақамли хизматлари экспортининг ортиб бораётгани билан ўз тасдиғини топмоқда.

Бундан ташқари, материалда тартибга солинадиган меҳнат миграцияси ва инсон капиталини ривожлантиришнинг янги тизими яратилиши масаласи алоҳида ёритилган.

Мақолада шунингдек, Сербия компаниялари томонидан мутахассисларни тўғридан-тўғри танлаб олиш, уларни Ўзбекистонда тил ва касбий тайёрлаш ҳамда электрон визаларнинг жорий этилиши ҳақида ҳам маълумот берилган.