ТОШКЕНТ, 18 август. /“Дунё” АА/. Куала-Лумпурда бўлиб ўтган қуръа ташлаш маросимига кўра, “Пахтакор” ва “Нефтчи” жамоаларининг ОФК Элит Осиё Чемпионлар Лигаси 2026/27 йилги мавсуми асосий босқичидаги рақиблари аниқланди, деб хабар бермоқда “Дунё” АА мухбири Тошкент клубининг telegram-каналига таяниб.

Ўзбекистонлик футбол мухлислари учун асосий воқеалардан бири Саудия Арабистонининг “Ан-Наср” жамоасининг Тошкентга ташрифи бўлади. Ар-Риёд жамоаси сафарда “Пахтакор”га қарши баҳс олиб боради. Шу тариқа, жаҳон футболи юлдузи Криштиану Роналду Ўзбекистон пойтахтида илк бор расмий клублар ўртасидаги ўйинни ўтказиши мумкин.

“Пахтакор” ўз майдонида Саудия Арабистонининг “Ан-Наср” ва “Ал-Қодисия” ҳамда Эроннинг “Трактор” ва “Истиқлол” жамоалари билан учрашади. Сафарда эса Саудиянинг уч клуби — “Ал-Аҳли”, “Ал-Ҳилол”, “Ал-Иттиҳод” ва Ироқнинг “Эйр Форс” жамоасига қарши майдонга тушади.

Пойтахт жамоаси маъмуриятининг таъкидланишича, турлар ҳақидаги маълумотлар, учрашувларнинг аниқ санаси ва вақти кейинроқ эълон қилинади.

Ўзбекистоннинг амалдаги чемпиони “Нефтчи” эса Саудия Арабистонининг бир йўла 5 жамоасига қарши ўйинлар ўтказади: “Ал-Аҳли”, “Ал-Ҳилол” ва “Ал-Иттиҳод”га қарши уйда, “Ан Наср” ва “Ал-Қодисия”га қарши сафарда. Бундан ташқари, Фарғона жамоасини уйда Ироқнинг “Эйр Форс”, сафарда Эроннинг “Истиқлол” ҳамда “Трактор” клубларига қарши ўйинлар кутмоқда.

Шу тариқа, ўзбекистонлик мухлислар Тошкентда “Ан-Наср” юлдузлари — Криштиану Роналду, Садио Мане, Кингсли Коман, Жоау Феликс каби юлдуз футболчиларнинг ўйинига гувоҳ бўлиши мумкин.

Қаршининг “Насаф” клубининг ҳам Осиё Чемпионлар Лигаси 2 турнири гуруҳ босқичидаги рақиблари маълум бўлди. Унга кўра, қаршиликлар А гуруҳидан жой олди. “Аждарлар”га ушбу гуруҳда БААнинг “Ал-Ваҳда”, Кувайтнинг “Кувайт СК” ва Баҳрайннинг “Ал-Халдия” клублари рақиблик қилади.