ЛОНДОН, 7 октябрь. /“Дунё” АА/. Буюк Британияда ўтказилган “FPC Fresh Awards 2026” кўргазмасида Ўзбекистон қишлоқ хўжалиги маҳсулотлари намойиш қилинди, деб хабар бермоқда “Дунё” АА мухбири.

Кўргазмада иштирокчилар эътиборига Ўзбекистон қишлоқ хўжалиги маҳсулотлари ишлаб чиқарувчилар уюшмаси, “Quva AgroStar”, “Seven Hills Agro”, “Global Export”, “Gardencells”, “Nishon Agro Logistik Tomorqa Xizmati” каби маҳаллий компаниялар томонидан етиштирилган ва қайта ишланган сабзавот, мева, қуритилган маҳсулот ҳамда дуккакли экинлар тақдим этилди.

Маҳсулотлар “Made in Uzbekistan” ягона бренди остида намойиш этилгани юқори сифатли ва рақобатбардош ўзбек товарларини кенг тарғиб қилишга хизмат қилди.

Шунингдек, тадбир муносабати билан чоп этилган махсус “Winners' Brochure” тақдимот материалларида Ўзбекистон озиқ-овқат маҳсулотларининг экспорт салоҳияти ва имкониятларига бағишланган ахборот-реклама маълумотлари ҳам жой олди.

Кўргазма якунлари бўйича ўзбек маҳсулотларига қизиқиш билдирган хорижий компаниялар билан ҳамкорликни ривожлантириш, экспорт шартномаларини тузиш ҳамда Буюк Британия бозорига етказиб беришни кенгайтириш юзасидан музокаралар олиб борилди.