БИШКЕК, 20 август. /“Дунё” АА/. Қирғизистоннинг “Alliance-press” порталида Ўзбекистонда давлат ва хусусий сектор ўртасидаги муносабатлар ривожига бағишланган мақола эълон қилинди, деб хабар бермоқда “Дунё” АА мухбири.

Мақолада Ўзбекистон Президентининг тадбиркорлар билан очиқ мулоқоти сўнгги беш йилда муаммоларни ҳал этишга қаратилган мулоқот майдонидан иқтисодий сиёсатнинг муҳим механизмларидан бирига айлангани ёзилган.

Шу билан бирга, бизнес юритиш шартларини такомиллаштириш, солиқ маъмурчилиги, кредитлаш ва тадбиркорлар ҳуқуқларини ҳимоя қилиш тизимидаги ўзгаришларга эътибор қаратилган.

Нашрда тадбиркорлар билан ўтказилган бешта очиқ мулоқот натижалари таҳлил қилиниб, пандемия даврида бизнесни қўллаб-қувватлаш, давлат хизматларини рақамлаштириш, экспортни рағбатлантириш ва стартапларни ривожлантиришгача бўлган чоралар алоҳида эътироф этилган.

Хусусан, ҚҚС ставкасининг 12 фоизга туширилгани, микробизнес ва ўзини ўзи банд қилган шахслар учун айланмадан олинадиган солиқнинг 1 фоизлик имтиёзли режими жорий этилгани таъкидланган.

Материалда хусусий секторнинг мамлакат иқтисодиётидаги ўрни сезиларли даражада ошгани ҳам қайд этилган. Жумладан, ўрта ва йирик корхоналар сони беш йил давомида икки баробар кўпайгани тадбиркорлик муҳитида барқарор ўсиш кузатилаётганидан далолат бериши қайд этилган.