ВАШИНГТОН-ТЕҲРОН, 11 июнь. /“Дунё” АА/. Дональд Трамп мамлакатга “қаттиқ зарбалар” берилишини эълон қилганидан сўнг АҚШ томонидан амалга оширилган сўнгги зарбалар учун қасос сифатида Эрон Форс кўрфази минтақасидаги Америка базаларига ҳужум қилди, дея хабар бермоқда “Дунё” АА мухбири “Reuters” агентлигига таяниб.

АҚШ Марказий қўмондонлиги (CENTCOM) Президент Дональд Трамп Теҳрон урушни тўхтатиш учун “келишувни имзолашни жуда узоққа чўзганини” айтганидан сўнг, кечаси амалга оширилган “мудофаа зарбалари”нинг иккинчи куни якунланганини маълум қилди. Бунга жавобан Эрон бир кун аввалги жавоб ҳужумларига учраган Баҳрайн ва Қувайтдаги Америка ҳарбий базаларига зарба берганини эълон қилди.

Американинг сўнгги зарбасидан сўнг Эрон жанубидаги Ҳурмуз бўғози яқинидаги шаҳарларда портлашлар эшитилди. Америка кучлари аввалги ҳужумлар тўлқинида ҳам ушбу ҳудуддаги ҳаво ҳужумидан мудофаа объектлари, радиолокация станциялари ва бошқа нишонларга зарбалар берган эди.

Сўнгги кескинлашув чоғида Ислом инқилоби посбонлари корпуси (ИИПК) Ҳурмуз бўғозидан ўтаётган иккита нефть танкерига зарба берганини ҳам маълум қилди. Бироқ ўша вақтда бу маълумотнинг мустақил тасдиғи бўлмаган. Бу воқеа Эрон давлат оммавий ахборот воситалари Ҳурмуз бўғози “барча турдаги кемалар учун тўлиқ ёпилгани” ҳақида хабар тарқатганидан сўнг юз берди. Айни пайтда CENTCOM “тижорий кемалар бўғоз орқали ҳар икки йўналишда ҳаракатланишда давом этаётганини” билдирди.

АҚШ Президенти, агар тинчлик келишувига эришилмаса, Эронга яна зарба берилишини қўшимча қилди.

Эрон Президенти Масъуд Пезешкиён эса мамлакат “ҳар қандай босим ёки таҳдидларга қатъий қарши туришини” таъкидлади. Аввалроқ, Эрон Ташқи ишлар вазирлиги АҚШни “юбораётган зиддиятли сигналлари билан дипломатик жараёнга путур етказаётганликда” айблаган эди.

Эслатиб ўтамиз, апрель ойида АҚШ ва Эрон дастлаб икки ҳафта амал қилиши керак бўлган ўт очишни тўхтатиш тўғрисида келишиб олган эди. Ўшандан бери томонлар кенг кўламли жанговар ҳаракатларга қайтмаган ҳолда, вақти-вақти билан ўзаро зарбалар алмашиб турди.

Бироқ, Вашингтон ва Теҳрон ўртасида музокаралар ташкил этишга қаратилган сўнгги уринишлар боши берк кўчага кириб қолди ва ҳужумлар шиддати ошди. Айни пайтда Эрон, Ироқ, Сурия ва Қувайтнинг ҳаво ҳудуди ёпиқ. Минтақанинг бошқа мамлакатларида ҳам чекловлар жорий этилиши эҳтимолдан холи эмас.

“AP” агентлиги сурати