ВАШИНГТОН, 4 май. /“Дунё” АА/. АҚШ президенти Дональд Трамп Эроннинг можарони ҳал қилиш бўйича янги таклифи билан танишгани, бироқ уни қабул қилиб бўлмас деб ҳисоблаганини маълум қилди, деб хабар бермоқда “Дунё” АА мухбири “AP” агентлигига таяниб.

“Мен учун бу қабул қилиб бўлмайдиган ҳолат. Мен ҳаммасини ўрганиб чиқдим. Буни қабул қилиб бўлмайди” – дея фикр билдирган Оқ уй раҳбари.

Аввалроқ, Америка етакчиси “Truth Social” ижтимоий тармоғида кескин баёнот бериб, “Теҳрон сўнгги 47 йил ичида инсониятга қилган ишлари учун ҳали етарлича бадал тўламаганини” таъкидлаган.

Эроннинг “IRNA” агентлиги маълумотларига кўра, Эрон ўзининг сўнгги музокара таклифи матнини Теҳрон ва Вашингтон ўртасидаги алоқаларда воситачилик қилаётган Покистонга етказган. Ташаббус замирида минтақада тинчликка эришиш ва ҳарбий ҳаракатларни тўхтатишга қаратилган таклифлар ётгани айтилмоқда.

Дональд Трамп, шунингдек, 4 майдан бошлаб Америка ҳарбийлари блокировка қилинган Ҳурмуз бўғози орқали фуқаролик кемаларини кузатиб боришни бошлашини эълон қилди. Операция “Озодлик лойиҳаси” деб номланди.

АҚШ президенти буни, 28 февралдаги уруш бошланганидан бери Форс кўрфазида қолиб кетган юзлаб кемалар экипажлари манфаати учун инсонпарварлик ҳаракати, деб таърифлади.

АҚШ Марказий қўмондонлиги операцияга бошқариладиган ракеталарга эга эсминецлар, юздан ортиқ ҳаво ва денгиз учиш аппаратлари, учувчисиз платформалар ва 15 минг ҳарбий хизматчи жалб қилинганини маълум қилди.

Эрон парламенти Миллий хавфсизлик комиссияси раҳбари Иброҳим Азизий Х ижтимоий тармоғида Американинг Ҳурмуз бўғозидаги кема қатновига ҳар қандай аралашуви сулҳни бузиш, деб баҳоланишини ёзди.

“AP” агентлиги сурати