ВАШИНГТОН, 29 апрель. / “Дунё” АА/. Оқ уй президент Дональд Трамп портрети туширилган АҚШ паспортларининг чекланган сериясини ишлаб чиқариш режаларини тасдиқлади, деб хабар бермоқда “Дунё” АА мухбири.

Оқ уйнинг инстаграмдаги расмий саҳифасида ёзилишича, янги ҳужжатлар июль ойида бўлиб ўтадиган АҚШ Мустақиллик декларациясининг 250 йиллигини нишонлашга бағишланган.

Паспорт дизайни Мустақиллик декларацияси матни ва Америка байроғи билан ўралган Дональд Трамп тасвири, шунингдек, президентнинг олтин рангдаги имзосини ўз ичига олади.

Давлат департаментининг аниқлик киритишича, ҳужжат паспорт учун ариза топширган барча АҚШ фуқаролари учун мавжуд бўлади, бироқ чиқариш сони чекланган ва фақат Вашингтон паспорт агентлиги орқали амалга оширилади.

Оқ уйнинг таъкидлашича, ташаббус мамлакатнинг 250 йиллигини кенг нишонлаш доирасида юбилей тадбирларини қўллаб-қувватлаш ва “миллий ғурур ва ватанпарварликни мустаҳкамлаш”га қаратилган. Қайд этилишича, янги паспортлар маъмуриятнинг юбилей билан боғлиқ қатор ташаббуслари, жумладан, спорт ва маданий тадбирларнинг бир қисми бўлади.

Ҳозирда стандарт Америка паспортларида Ойга қўниш каби тарихий воқеалар, миллий рамзлар, хусусан, Озодлик ҳайкали тасвирланган.

Ташаббус маъмуриятнинг давлат лойиҳаларида Дональд Трамп номи ва қиёфасини абадийлаштириш бўйича кенгроқ амалиётининг бир қисмига айланди. Аввалроқ, АҚШ зарбхонаси президент тасвири туширилган эсдалик олтин тангаси чиқарилишини эълон қилган. Шунингдек, Америка банкнотларида унинг имзосидан фойдаланиш режалаштирилган.

“AP” агентлиги сурати