ВАШИНГТОН–ТЕҲРОН, 14 август. /“Дунё” АА/. АҚШ Эронга нисбатан ҳарбий-денгиз блокадасини муддатсиз давом эттириш ва Теҳронга нисбатан иқтисодий босимни кучайтиришини маълум қилди, деб хабар бермоқда “Дунё” АА мухбири.

“Reuters” агентлигининг хабар беришича, АҚШ уруш вазири Пит Хегсет Америка ҳарбий-денгиз кучлари кемаларни алмаштириб туриш ҳисобига блокадани чекланмаган вақт давомида ушлаб туришга қодир эканини қайд этган.

“Қўшма Штатлар бундай блокадани чекланмаган вақт давомида ушлаб туришга қодир. Чунки биз кемаларни алмаштирамиз ва бу ишни давом эттираверамиз”, – деган Пит Хегсет.

АҚШ молия вазири Скотт Бессент Вашингтоннинг Эронга қарши янги чоралар тайёрлаётганини маълум қилди. Унинг сўзларига кўра, келаси ҳафтанинг ўзидаёқ Теҳронга мисли кўрилмаган молиявий босим ўтказадиган чора-тадбирлар эълон қилинади.

Шу билан бирга, Эрон Ҳўрмуз бўғозини назорат қилишда давом этаётганини баён қилиб, тижорат кемалари мамлакат қуролли кучларининг рухсати ва назоратисиз бўғоздан хавфсиз ўта олмаслигини айтган.

АҚШ Президенти Дональд Трампнинг фикрича, Вашингтон Ҳўрмуз бўғозини тўлиқ назорат қилмоқда. У Америка блокадасини “Пўлат девор” дея атаган. Эрон бу даъволарни рад этяпти. Уруш бошланишидан аввал бўғоз орқали 130–140 та кема ўтган бўлса, ҳозирда улар сони атиги 8 тани ташкил этаяпти.

Кеча БААнинг “ADNOC” давлат нефть компаниясига қарашли иккита кемага ҳужум қилинди. Мамлакат ҳукумати ушбу воқеани Эрон томонидан уюштирилган ҳужум деб баҳолади.

Айни вақтда Теҳрон Ўмон билан Ҳўрмуз бўғози орқали янги йўналиш яратиш бўйича музокараларни давом эттирмоқда. Бироқ ҳозирча келишувга эришилмаган. Эроннинг таъкидлашича, ҳатто янги йўналишнинг очилиши ҳам кемалар қатновини тиклаш учун етарли бўла олмайди: Теҳрон АҚШдан санкцияларни бекор қилишни ва музлатиб қўйилган Эрон активларини блокдан чиқаришни талаб қилаяпти.

АҚШ вице-президенти Жей Ди Венс Эронга қарши операциянинг асосий мақсади сифатида унинг ядровий қуролга эга бўлишининг олдини олиш ҳамда америкаликлар учун нефть ва газ нархларини барқарор сақлаб қолишни кўрсатди.

АҚШнинг минтақадаги ҳарбий иштироки ҳам кучаймоқда. “USS George Washington” авиаташувчи кемаси Тинч океанидан Яқин Шарққа йўл олган. Ушбу кема минтақада узоқ муддат – 260 кундан ортиқ узлуксиз денгизда бўлган “USS Abraham Lincoln” ўрнини эгаллаши кутилмоқда.

“AFP ” агентлиги сурати