СЕУЛ, 26 июнь. /“Дунё” АА/. Жанубий Кореянинг собиқ президенти Юн Сок Ёлнинг рафиқаси Ким Гон Хи коррупция, хусусан, давлат лавозимларига тайинлаш эвазига пора олгани учун етти йилга озодликдан маҳрум этилди, деб хабар бермоқда “Дунё” АА мухбири “Yonhap” ААга таяниб.

Сеул Марказий округ суди Ким Гон Хи оддий одамлар учун деярли имконсиз бўлган қимматбаҳо буюмларни ҳеч иккиланмай қабул қилганини таъкидлаб, ҳукм чиқарди.

Собиқ президент жуфтлигига нисбатан коррупция ишини тергов қилган махсус прокурор Мин Чжун Ги бошчилигидаги гуруҳ Ким Гон Хини давлат лавозимларини қимматбаҳо тақинчоқлар ва ҳашаматли буюмларга алмаштиргани учун 7,5 йилга озодликдан маҳрум қилишни сўраган эди.

Эслатиб ўтамиз, собиқ президент Юн Сок Ёлнинг ўзи февраль ойида 2024 йилда ҳарбий ҳолат жорий этилиши билан боғлиқ исён иши бўйича умрбод қамоқ жазосига ҳукм қилинган эди. Кейинроқ, июнь ойида Сеул суди уни КХДРни ҳарбий провокацияси иши бўйича ҳам 30 йилга озодликдан маҳрум қилди.

“AP” агентлиги сурати