ТОШКЕНТ, 10 октябрь. /“Дунё” АА/. Ўмоннинг Ад-Даҳилия вилояти Манаҳ шаҳридаги Султон Қобус араб тилини ўқитиш институтида икки ойлик араб тили курсида таҳсил олиш учун келган чет эллик талабалар учун маданий тадбир ташкил этилди, деб хабар бермоқда “Дунё” АА мухбири.

Мазкур учрашувда юртимиздан борган талабалар ҳам иштирок этди. Тадбирда мамлакатимизнинг Ўмондаги элчихонаси дипломатлари ўзбекистонлик талабалар билан биргаликда Ўзбекистоннинг туризм салоҳияти ва тарихий обидалари ҳақида алоҳида тўхталиб ўтди.

Тадбир доирасида кўргазма ташкил этилиб, унда Ўзбекистоннинг ҳунармандчилик маҳсулотлари, миллий либослари ва таомлари намойиш этилди. Мамлакатнинг туристик салоҳияти кенг тарғиб қилиниб, меҳмонларга сайёҳлик қўлланмалари тарқатилди.

Учрашувда Манаҳ шаҳри Тарихий-маданий маркази директори Халфан ал-Азрий ҳамда Султон Қобус араб тилини ўқитиш институти раҳбари Усмон ас-Саъдий сўзга чиқиб, мамлакатлар ўртасида амалга оширилаётган ҳамкорлик лойиҳалари ҳақида фикр билдирди.

Миср, Ҳиндистон, Франция, Туркия, Буюк Британия, Қозоғистон, Польша, Россия, Беларусь ва Украина талабалари томонидан намойиш этилган маданият, миллий урф-одатлар, анъаналар ва миллий таомлар кўпчиликда катта қизиқиш уйғотди.

Тадбир маданиятлараро алмашинувни ривожлантириш, Ўзбекистоннинг сайёҳлик салоҳиятини тарғиб қилиш ҳамда икки давлат ўртасидаги гуманитар ва таълим алоқаларини мустаҳкамлашга хизмат қилди.