МОСКВА, 12 октябрь. /“Дунё” АА/. Москвада бўлиб ўтган Х Халқаро “Евроосиё кўприги” кинофестивалида ўзбекистонлик режиссёр Рашид Маликовнинг “Пахта” фильми “Энг яхши фильм” номинациясида Гран-при мукофотига сазовор бўлди, деб хабар бермоқда “Дунё” АА мухбири.

Картинада ҳаёт қийинчиликлари ва қатор муаммоларга дуч келиб, янги ҳаёт мазмунини излаётган аёл тақдири ҳақида ҳикоя қилинади. Ҳайъат аъзоси Мария Бородянская фильм турли мамлакатлар томошабинларига тушунарли бўлган муҳим ижтимоий муаммоларни очиб беришини таъкидлаб, мазкур мукофот унга кенг аудитория топишда хизмат қилишига ишонч билдирди.

Режиссёр Рашид Маликов ушбу ютуқ актёрлар, продюсерлар, операторлар, рассом ва бастакорлардан иборат бутун ижодий жамоанинг хизмати эканини қайд этди. Режиссёр кинематографиянинг бирлаштирувчи кучига алоҳида тўхталиб ўтди.

“Фильм яратаётганда уни томошабин қандай қабул қилишини олдиндан билмайсиз. Бу ҳикоя билан узоқ вақт яшайсиз, унга куч, ҳаяжон ва умидларни синдирасиз, кейин эса уни қўйиб юборасиз ва энди ҳеч нарсага таъсир қила олмайсиз. Шунинг учун фильмнинг эътироф топиши айниқса муҳимдир”, – деди Рашид Маликов.

“Евроосиё кўприги” фестивали 2016 йилдан буён Россия Маданият вазирлиги кўмагида ўтказиб келинади. Мазкур анжуман илк бор Москва шаҳрида ўтказилиб, 14 давлат ижодкорларини бирлаштирди.

Пойтахтнинг еттита майдончасида томошабинларга 28 та фильм тақдим этилди. Фестивалда Ўзбекистон билан биргаликда Россия, Болгария, Буюк Британия, Вьетнам, Греция, Ҳиндистон, Испания, Хитой, Корея Республикаси, Бирлашган Араб Амирликлари, Руминия, Туркия ва Швейцария вакиллари иштирок этди.

Тадбирнинг ахборот ёритилиши Россиянинг етакчи оммавий ахборот воситалари, жумладан, “Культура” газетаси, “Российская газета”, “ТАСС” ахборот агентлиги ҳамда “Кино Mail” портали томонидан таъминланди.