ИРКУТСК, 19 октябрь. /“Дунё” АА/. Ўзбекистоннинг Новосибирск шаҳридаги Бош консулхонаси томонидан кеча Иркутск шаҳридаги “Наше Отечество” ўзбек миллий-маданий маркази билан ҳамкорликда Ўзбек тили байрамига бағишланган тадбир ўтказилди, деб хабар бермоқда “Дунё” АА мухбири.

Мазкур тадбирда Иркутск шаҳрида таҳсил олаётган ва меҳнат қилаётган ватандошларимиз иштирок этди.

Тадбир қатнашчилари ўз чиқишларида ўзбек тилининг бойлиги ва бетакрорлиги асрлар оша – қадимги туркий, эски ўзбек ва ҳозирги замон адабий тили каби уч асосий босқичда шаклланганини алоҳида таъкидладилар. Бугунги кунда юксак мақомига эга бўлган она тилимиз замонавий ўзбек адабий тилининг асосчиси Ҳазрат Алишер Навоий номи билан чамбарчас боғлиқлиги қайд этилди.

Шунингдек, буюк бобомизнинг бой мероси бугун ҳам бутун жаҳон маданияти ва адабиёти учун улкан аҳамият касб этиши таъкидланди.