МАДРИД, 29 октябрь. /“Дунё” АА/. Кеча Испанияда Мадрид жанубдаги темир йўл линиясида иккита тезюрар поезд тўқнашиб кетиши натижасида камида 68 киши ҳалок бўлди, ўнлаб одамлар жароҳат олди, деб хабар бермоқда “Дунё” АА мухбири Испаниянинг “EFE” ахборот агентлигига таяниб.

Агентликнинг маълум қилишича, “Renfe” миллий оператори ва “Iryo” хусусий компанияси поездлари тўқнашиб, бир нечта вагон рельсдан чиқиб кетиши оқибатида ағдарилган ва кўтармадан қулаб тушган.

Ҳодиса содир бўлган куни 77 нафар жабрланувчи шифохоналарга етказилган, улардан 15 нафарининг аҳволи оғир эди. Қутқарувчилар шикастланган вагонларни очиб кўришда давом этаётгани сабабли расмийлар қурбонлар сони ортиши мумкинлигини истисно қилмаган.

Испания транспорт вазири Оскар Пуэнтенинг маълум қилишича, ҳалокатдан олдин компьютердаги носозлик туфайли олтита поезд, жумладан, тўқнашган иккала таркиб ҳам тўхтаб қолган. Шундан сўнг диспетчерлик маркази тезликни чекламасдан ҳаракатни қайта тиклашга рухсат берган, бироқ бундай қарорнинг сабаблари ҳозирча аниқланмаган.

Поезднинг тезлиги соатига 200 км.га етган бўлиши мумкин. Тергов машинист қандай кўрсатмалар олгани ва нима учун поезд тўсиқ олдида тўхтамагани аниқламоқда.

Ҳодиса оқибатларини бартараф этиш учун ўт ўчириш гуруҳлари, вертолётлар ва мобил реанимация бригадалари жалб этилди. Ҳудуддаги шифохоналар жабрланганларни қабул қилиш учун режали жарроҳлик амалиётларининг бир қисмини бекор қилди, тиббиёт муассасалари эса аҳолини қон топширишга чақирди.

Бош вазир Педро Санчес мамлакатда уч кунлик миллий мотам эълон қилди. Ҳукумат раҳбарининг ўзи ҳалокат жойига бориб, қурбонларнинг оила аъзоларига ҳамдардлик билдирди. У ҳукуматнинг асосий вазифаси жабрланганларга ёрдам кўрсатиш ва фожиа сабабларини аниқлаш эканини таъкидлади.

Ўзбекистон Президенти Шавкат Мирзиёев Толедо провинциясида кўплаб инсонлар ҳалок бўлгани ва жароҳат олгани муносабати билан Испания Қироли Филипп VIга таъзия йўллади. Давлатимиз раҳбари Испания халқи ва марҳумларнинг яқинларига ҳамдардлик билдириб, жабрланганлар тез фурсатда соғайиб кетишини тилади.

“Reuters” сурати