МОСКВА, 16 апрель. /“Дунё” АА/. Москва шаҳрида Ўзбекистон Вазирлар Маҳкамаси ҳузуридаги Миграция агентлигининг Россиядаги ваколатхонасининг янгиланган офисининг очилиш маросими бўлиб ўтди, деб хабар бермоқда “Дунё” АА мухбири.

Тадбирда Ўзбекистон элчиси Ботиржон Асадов, Вазирлар Маҳкамаси ҳузуридаги Миграция агентлиги директори Беҳзод Мусаев, Россия бош прокурори ўринбосари Павел Городов, йирик иш берувчилар ҳамда юридик компаниялар вакиллари иштирок этди.

Тадбир доирасида Беҳзод Мусаевнинг Россиянинг йирик иш берувчилари билан музокаралари бўлиб ўтди, шунингдек, юридик ҳамжамият вакиллари иштирокида "Россия Федерациясида Ўзбекистон Республикаси фуқароларига ҳуқуқий ёрдам кўрсатиш механизмларини такомиллаштириш" мавзусида давра суҳбати ўтказилди.

Давра суҳбатининг асосий эътибори Россия ҳудудида бўлиб турган Ўзбекистон фуқароларининг ҳуқуқий ҳимоясини янада кучайтириш, уларга малакали ва ўз вақтида ҳуқуқий ёрдам кўрсатиш масалаларига қаратилди.

Муҳокамалар давомида Россиянинг янги миграция сиёсати билан боғлиқ долзарб жиҳатлар кўриб чиқилди, фуқаролар билан ўзаро ҳамкорлик тартиб-таомилларини рақамлаштириш бўйича таклифлар ишлаб чиқилди, шунингдек, Миграция агентлиги ваколатхонасининг 2025 йил ва 2026 йилнинг биринчи чорагидаги фаолияти натижалари ҳақида маълумот берилди.

Давра суҳбати иштирокчиларига "Megapolis" юридик фирмасининг тақдимоти ҳам намойиш этилди.

Муҳокамалар конструктив характерга эга бўлиб, ишчан ва дўстона муҳитда ўтди, иштирокчилар учрашув натижаларидан мамнун эканликларини ва ҳамкорликни янада мустаҳкамлашга тайёр эканликларини билдирдилар.