СИНГАПУР, 23 октябрь. /“Дунё” АА/. Ўзбекистоннинг Сингапурдаги элчихонаси ташаббуси билан мамлакатимиз мустақиллигининг 35 йиллигига бағишланган тантанали тадбир ўтказилди, деб хабар бермоқда “Дунё” АА мухбири.

Тадбирда Сингапур ҳукумати ва парламенти, сиёсий, ишбилармон ва маданий доиралар, дипломатик корпус вакиллари, мамлакатда истиқомат қилаётган ватандошларимиз иштирок этди.

Учрашувда Сингапур адлия ва транспорт вазири Мурали Пиллай фахрий меҳмон сифатида иштирок этиб, ўз ҳукумати номидан Ўзбекистон раҳбарияти ва халқини Мустақиллик куни билан табриклади.

У Ўзбекистоннинг бой тарихий ва маданий мероси, жадал ривожланаётган иқтисодиёти ҳамда мамлакатнинг халқаро майдондаги мавқеини мустаҳкамлашга қаратилган кенг кўламли ислоҳотларни эътироф этди.

Шунингдек, икки томонлама муносабатлар юқори даражада эканини таъкидлаб, ҳамкорлик ривожланиб бораётганидан мамнунлигини билдирди. Унинг сўзларига кўра, сўнгги йилларда алоқаларни мустаҳкамлаш борасидаги саъй-ҳаракатлар ўзаро савдо ҳажмининг ошишига ва Ўзбекистон иқтисодиётига киритилаётган Сингапур сармояларининг кўпайишига хизмат қилди.

Август ойида Сингапур катта вазири Ли Сян Луннинг Ўзбекистонга амалга оширган расмий ташрифи икки томонлама ҳамкорликка янги суръат бағишлади. Сингапур томонининг Ўзбекистон тарихи, маданияти, туризм салоҳияти ва иқтисодий имкониятларига бўлган қизиқиши ортгани алоҳида қайд этилди.

Тадбирда қатнашган Сингапур парламенти депутатлари парламентлараро алоқаларнинг ривожланишини ижобий баҳолаб, икки мамлакат қонун чиқарувчи органлари ўртасида мунтазам мулоқотни давом эттириш, ҳамкорликни кенгайтириш ва ўзаро тажриба алмашишга тайёр эканликларини билдирди.