ТОШКЕНТ, 27 октябрь. /“Дунё” АА/. Бугун пойтахтимиздаги “Ўзэкспомарказ” МКМда VIII Ўзбекистон халқаро тоғ-кон ва металлургия кўргазмаси – UIMF 2026 ўз ишини бошлади, деб хабар бермоқда “Дунё” АА мухбири.

27–29 октябрь кунлари бўлиб ўтаётган ушбу саноат маҳсулотлари ва технологиялари намойиши Ўзбекистон Тоғ-кон саноати ва геология вазирлиги ҳамда Металлургия уюшмаси кўмагида ўтказилмоқда.

Бу галги cаноат ярмаркасида Австралия, АҚШ, БАА, Бельгия, Буюк Британия, Германия, Канада, Нидерландия, Озарбайжон, Покистон, Россия, Тожикистон, Туркия, Франция, Хитой, Япония, Ўзбекистон, Қозоғистон ва Қирғизистондан 500 нафардан ортиқ делегат ҳамда 40 нафар спикер ва модератор иштирок этмоқда.

Учрашувларда геология-қидирув ишлари, фойдали қазилмаларни қазиб олиш ва қайта ишлаш, критик минераллар салоҳиятидан самарали фойдаланиш, ишлаб чиқаришни модернизация қилиш ва тармоққа инвестициялар жалб этиш билан боғлиқ масалалар муҳокама қилинмоқда.

Икки кунлик тадбир давомида тоғ-кон ва металлургия лойиҳаларини молиялаштиришнинг янги моделлари, геология-қидирув ишларида сунъий интеллектдан фойдаланиш ва саноатда энергия самарадорлигини ошириш масалалари кўриб чиқилади.

Иштирокчилар ресурс базасини кенгайтириш, хомашёни қайта ишлашнинг илғор усулларини жорий этиш ҳамда халқаро саноат кооперациясини мустаҳкамлаш бўйича фикр-мулоҳазалар алмашди.

“Биз электр тақсимлаш қурилмалари ишлаб чиқариш, объектларда кабель ётқизиш ҳамда дастурий таъминот билан шуғулланамиз. “UIMF 2026” кўргазмасида илк бор иштирок этаяпмиз. Тоғ-кон саноатида, хусусан, олтин қазиб олиш йўналишида ҳам тажрибага эгамиз. Дунё бўйлаб 25 дан ортиқ завод қурилишида қатнашганмиз. Ўзбекистонда ҳам лойиҳаларимиз мавжуд, жумладан, “Aurum” компанияси билан боғлиқ объектларда ишлаганмиз”, – деди Туркиянинг “Pacpro Otomasyon” компанияси вакили Наим Эсен.

Германиянинг “SIEMAG TECBERG GmbH” компанияси директори Деннис Хайзингер таъкидлашича, мазкур экспозиция немис ишбилармонларида ҳам катта қизиқиш уйғотган.

“Ўтган йил октябрь ойида ҳам ушбу кўргазмада иштирок этгандик. Бу йилги иштирокимиз иккинчиси. Ўзбекистоннинг йирик саноат корхоналари, жумладан, Олмалиқ кон-металлургия комбинати ҳамда Навоий кон-металлургия комбинати билан ҳамкорлик алоқаларини ўрнатганмиз. Ўзбекистон компаниялари билан шериклик алоқаларини янада кенгайтириш мақсадида бу гал ҳам “UIMF 2026”да қатнашаяпмиз”, – дейди Деннис Хайзингер.