ҚОҲИРА, 21 июль. /“Дунё” АА/. Ўзбекистон дипломатлари Мисрнинг биологик фаол қўшимчалар ишлаб чиқарувчи етакчи хусусий фармацевтика корхоналаридан бири — “Organix Company” раҳбарияти билан учрашди, деб хабар бермоқда “Дунё” АА мухбири.

Мулоқот чоғида Ўзбекистон фармацевтика саноатини ривожлантириш, биологик фаол қўшимчалар ишлаб чиқариш соҳасида ҳамкорликни йўлга қўйиш, шунингдек, мамлакатимиз бозорида Миср маҳсулотларини илгари суриш истиқболлари муҳокама қилинди.

Компания раҳбарияти Ўзбекистонни жадал ривожланаётган, инвестициялар учун қулай ишбилармонлик муҳитига эга ҳамда фармацевтика соҳасида катта салоҳиятга эга истиқболли бозор сифатида баҳолашини таъкидлади.

Шу муносабат билан “Organix Company” раҳбарлари Ўзбекистонда дистрибьюторлик фаолиятини амалга ошираётган маҳаллий фармацевтика компаниялари билан тўғридан-тўғри ҳамкорлик ўрнатишдан манфаатдор эканликларини билдиришди.

Қайд этилишича, компания дастлабки босқичда ўз маҳсулотларини Ўзбекистон бозорига етказиб бериш орқали бозор конъюнктураси ва истеъмол талабини ўрганишни режалаштирмоқда.

Кейинги босқичда эса олинган натижалардан келиб чиқиб, мамлакатимизда инвестиция лойиҳаларини амалга ошириш ёки замонавий технологияларни трансфер қилиш имкониятларини кўриб чиқиш ниятида.

“Organix Company” 2017 йилда ташкил этилган бўлиб, биологик фаол ва озиқ-овқат қўшимчаларини ишлаб чиқаришга ихтисослашган Мисрнинг жадал ривожланаётган хусусий фармацевтика компанияларидан бири ҳисобланади.