КИНШАСА, 13 август. /“Дунё” АА/. Конго Демократик Республикасида Эбола вируси жадал суръатларда тарқалишда давом этмоқда: айни пайтда касалликнинг тарқалиш кўлами тахминан ҳар 20 кунда икки баробарга ортмоқда, деб хабар бермоқда “Дунё” АА мухбири “БМТ янгиликлари”га таяниб.

КДР ҳукумати касалликнинг 4449 та тасдиқланган ҳолати ва 2061 та ўлим қайд этилганини маълум қилди. Шундай қилиб, ташхис қўйилган ҳар иккинчи бемор вафот этмоқда. Ҳозирги касаллик авж олишига кам учрайдиган Бундибужио вируси сабаб бўлган.

ЖССТ маълумотларига кўра, инфекциянинг тарқалиши февраль ойидаёқ бошланган, бироқ дастлаб айрим ҳолатлар безгак ёки қорин тифи деб хато талқин қилинган бўлиши мумкин.

ЖССТ раҳбари Тедрос Адханом Гебрейесуснинг огоҳлантиришича, агар ҳозирги суръат сақланиб қолса, касаллик авж олиш кўлами бўйича 2014–2016 йилларда Ғарбий Африкада 11 мингдан ортиқ кишининг ҳаётига зомин бўлган эпидемиядан ҳам ошиб кетиши мумкин. Шу билан бирга, ЖССТ вируснинг юқишини уч ой ичида назорат остига олишни режалаштирмоқда.

Конго Демократик Республикасининг шарқий қисмидаги беқарорлик вазиятни янада мураккаблаштирмоқда. ЖССТнинг Африка бўйича минтақавий директори Муҳаммад Жанабийнинг сўзларига кўра, айни пайтда тиббиёт ходимлари касаллик қайд этилган ҳолатларнинг атиги 30 фоизигагина етиб бора оляпти.

“Биз вирусни қувмоқдамиз, аммо вирус биздан ўзиб кетмоқда”, – деди Муҳаммад Жанабий ҳамда беморларни аниқлаш ва изоляция қилиш чораларини кучайтириш зарурлигини таъкидлади.

Бундибужио вирусига қарши иккита вакцина илк бор одамларда синовдан ўтказила бошланди. Улардан бири Оксфорд университети жамоаси томонидан COVID-19га қарши “Oxford-AstraZeneca” вакцинасини яратишда қўлланилган технология асосида ишлаб чиқилган. Яна учта гуруҳ эса ҳозирча клиник синовлар босқичига етиб бормаган бошқа вакциналар устида ишламоқда.

Шу билан бирга, Эбола вирусининг кенг тарқалган Zair турига қарши вакциналарнинг ҳайвонлардаги икки синови якунланди. ЖССТ раҳбарининг сўзларига кўра, натижалар ҳайвонларда умидбахш ўзаро ҳимояни намоён этган. ЖССТ клиник синовларнинг учинчи босқичига ўтишни тавсия қилди.

“Биз бу вакцинанинг одамларда Бундибужиога қарши самарадор ёки йўқлигини билмаймиз ва айнан шунинг учун ҳам бизга синовларнинг янги босқичи керак, – дея қайд этди Тедрос Адханом Гебреесус. – ЖССТ, ҳукуматлар ёки “Africa CDC” бу ишни ёлғиз ўзи қилаётгани йўқ. Биз ягона жамоа бўлиб биргаликда ҳаракат қилмоқдамиз”.

“AFP” агентлиги сурати